Grand Slam title 25 lak tlin tuma tan khawh Novak Djokovic chuan Wimbledon-ah hnehna changin hma lam a pan zel. Djokovic hian inrinni zan khan Wimbledon-a a vawi 10 nan hnehna a chang a, fourth round a inhlangkai. Djokovic rual hian Jannik Sinner pawhin awlsam takin hnehna a chang ve bawk.
Wimbledon-ah vawi 99 chak tling tawh Djokovic hian inrinni zan khan an hnampui Miomir Kecmanovic a hmachhawn. Kecmanovic lakah hian bul a tan tha a, game thum chauh hloh chungin set khatna a la nghal. Set khatna a lak hnuin set hnihnaah a khel tha leh zual a, game khat lek pawh hloh miah lovin set a la zui leh. Set hnih a hloh zawn hnuin Kecmanovic hi set thumnaah a khel tha hret a, game pawh a la tam ve ta deuh. Grand Slam-a vawi 24 zet champion tawh Sjokovic lakah game li la thei mah se a serve a hum zawh loh vangin a tlawm zui ta tho thung a. Nole hian 6-3 6-0 6-4 a hnehna changin fourth round a lut.
Fourth round-ah Alex de Minaur hmachhawn zui leh tur Djokovic-ah vawi 100 hnehna a chang tling chiah a, mel lung thar a phun belh. Wimbledon-ah bik Djokovic hi chak tam lama pathumna a ni a. A chungah hian hmeichhe lama vawi kua champion tawh Martina Navratilova leh mipa lamah vawi riat champion a, champion ngun ber ni mek Roger Federer te an awm. Djokovic hi a vawi riat nan a champion thei a nih chuan Wimbledon-a chak tam lamah Federer a khum thei chiah dawn. A chak zel a nih chuan Djokovic hian semi-final-ah Sinner a hmachhawn a ngai dawn. Sinner hi tunlaia a ngam loh ber a ni.
Inrinni zana inkhek dangah champion tura rinkai ber Jannik Sinners chuan awlsam takin hnehna a chang nawn leh a, fourth round a inhlangkai. Sinner hian Third round-a a khingpui Pedro Martinez chu a sawp leh viau a, 6-1, 6-3, 6-1 a hnehna changin fourth round a lut. Fourth round-ah Grigor Dmitrov a hmachhawn zui leh dawn.
