Daily Newspaper

A vawi khat nan Artist 100 chart-ah Bob Dylan a No.1

10

Bob Dylan, kum 79, chu a vawi khat nan Billboard Artist 100 chart-ah a No.1. He chart hi kar khat chhunga US-a zaithiam lar dan tehna a ni a, chart No.1 ni thei chu kar khat chhunga US-a zaithiam lar ber tihna a ni ber mai. He chart hi 2014 atanga an kalpui tan chauh a ni thung a, Bob Dylan te vanglaiin hetiang chart hi a la awm lo tih erawh hre tel ila. Dylan hi he chart-a No.1 ni thei upa ber a la ni bawk. Artist 100 chart ranking siam nan hian kar khat (Zirtawpni – Ningani) chhunga US-a album leh hla hralh tam dan te, streaming leh radio-a an zaitir nasat dan leh social media fan interaction te chu tehna pawimawh a ni. Zaihiam leh hlaphuah thiam hmingthang, Nobel Prize te pawh dawng tawh Bob Dylan hian a album thar ‘Rough and Rowdy Ways’ chu Billboard 200 (albums) chart No.2-ah a debut pui a, hei pawh hi thangkhat lian zet chhunga chart top 10-a a lan lehna hmasa ber a ni a, hei hian Artist 100 chart-ah pawh a vawrh sang ta a ni. Dylan hian Billboard 200 chart-ah top 10 kai thei album 23 a nei tling tawh a, hei bakah hian 1960s, ’70s, ’80s, ’90s, ’00s, ’10s leh ’20s-ah te chart top 40 kai thei album nei thei awm chhun a la ni bawk. ‘Rough and Rowdy Ways’ hi Top Rock Albums leh Americana/ Folk Albums-ah te pawh a No.1 nghe nghe a ni. Kar kalta chart No.1 Lil Baby chu No.2-ah a tawlh a, Post Malone chu No.3-ah bawk la awmin, BTS chu No.2 atangin No.4-ah an tawh a, Luke Combs chu No.7 atangin No.5-ah a insawn a, Harry Styles pawh No.8 atangin No.6-ah insawnin, DaBaby pawh No.9 atangin No.7-ah a insawn a, The Weeknd chu No.4 atangin No.8- ah a tawlh a, Roddy Ricch chu No.11 atangin No.9 a kai a, Drake chu No.10-ah bawk a la awm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy