Daily Newspaper

A vawi khat nan tum dang ang lovin

9

Aizawl, December 22 : Mizote hun pawimawh leh ngaih pawimawh Krismas chu kuminah kum danga an hman ngai loh dana hman a ngai dawn a, biak in hawn a nih loh bakah kohhranin puipunna hun an buatsaih lo ang. Mizote’n Krismas an hman ve hnuah chutiang chu a la awm ngai lo.

1966-a Zoramin zalenna a sual khan ram a buai a, mahse khami kumah khan kohhrante’n kum dang ang bawkin Krismas an hmang thei. Hmun thenkhatah chuan an lo ralti deuh a ni thei a, khawimaw laiah chuan sipaiin biak in an hal avanga harsatna tawk te pawh an awm ang. Mahse a ram puma biak ina inkhawm loh leh mipui kalkhawm loh chu a ni lo a, kumin erawh Covid-19 hrileng vangin Mizoram state pumah kum dang anga inkhawm leh lenkhawm, ruai theh te a awm thei dawn lo. Mizoram state pawna Zofate pawhin kum dang angin an hmang thei dawn lo nia hriat a ni.

Historian B Lalthangliana chuan Krismas chu Zofate hun pawimawh a nih thu a sawi a, Zofate’n Krismas an hman ve hnu-ah 2019 thleng kha chuan tih dan pangngaia an hman thu sawiin, kohhranin biak ina inkhawm leh ruai te a buatsaih loh hi a la awm ngai lo tih a sawi.

Zofate tana Krismas pawimawhna sawiin B Lalthangliana chuan, “Pi leh pute huna kut kan lo neihte thlaktu a ni,” a ti.

“Sakhaw hun a ni a, sakhua taka kan hlimpui bakah sakhua lutuk lo zawng pawhin kan hun hlimawm a ni a, kan nghakhlel a, a lo thlen chuan kan hlim a, mipui huap hun pawimawh a ni,” a ti a, Rokunga hlaa “Aw, a va mawi em! He ni lawmawm hun tawi te hi,” tih hla hian Mizote thinlunga Krismas hlutna a tilang tih a sawi bawk.

Krismas chu Mizote tan kawng hrang hrangin a pawimawh tih a sawi a, thu leh hla lamah pawh a pawimawh tih sawiin, “Krismas hi thu leh hla tha tak tak min petu a ni a, thu leh hla lama min tihausatu a ni,” a ti.

Mizote’n Krismas an hmasak ber kum hi sawi dan hrang hrang a awm a, sawi dan pakhatah chuan 1903-ah khan Aizawlah mipui huapin Krismas an lo hmang tawh tih a ni. 1901-ah Pukpui-ah an hmang tawh tih a ni bawk. 1872-ah khan British sipaite’n Mizoram chhungah Krismas hi an hmang tih a ni bawk a, hei hi chu Mizote telna a ni lo.

Khawvelah Covid-19 hri a len avangin kuminah khawvel hmun dang ang bawkin Mizoramah pawh sakhaw hmunte khar a ni a, Krismas programme pawh kohhranin a hma angin a siam thei dawn lo.

Krismas bazar pawh a lun lo a, sorkarin hri do nan inkaihhruaina a siam avangin kum dang angin December-ah huauhuau leh intihhlimna lam pawh huaihawt theih a ni lo. Krismas hla saa zai thawm hriat tur pawh a awm meuh rih lo a, kum dang nena khaikhin chuan thawm a reh rih hle.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy