Head coach Roberto Martinez-a’n kumin World Cup khel tur player 27 awmna provisional squad a puanah beisei lawk ang ngeiin Portugal tana he tournament tum nga ngawt khel tawh Cristiano Ronaldo a hmaih lo a, World Cup vawi ruk khel tling mi tlemte zingah a tel thei dawn.
Kum 41 mi lai ni tawh chunga taksa la phiar nalh leh la fit zek reng mai forward Ronaldo hi mipate zinga international game khel hnem ber (226) leh gol pawh thun tam ber (143) ni mekin, World Cup vawi nga khel tling player paruk zinga pakhat a ni mek.
Mi bik paruk zingah hian La Liga lama an awm tlan laia a elpui lian Lionel Messi pawh kha telin, Argentina captain pawh hi a tum rukna’n kumin World Cup-ah a inlan ngei rin a ni a, kum li kalta Qatar rama an hlawhchhuah trophy humhim tur khan a ho ngeia Argentine-ho an lo thawhchhuah rin ngheh tlat a ni!
Ballon d’Or chawimawina tum nga tehreng dawng tling tawh Ronaldo hian Messi ang bawkin Europe a chhuahsan tawh a, January 2023 atanga tun thleng hian Saudi Arabian club Al-Nassr tan a la khel zui ta zel a ni.
Nikum November thla Portugal World Cup qualifier tawpber dawttua Republic of Ireland an tum tuma hnawhchhuah tawk Ronaldo khan match thum hremna a pumpelh hlauh avangin kumin World Cup-ah hian group game a khel kim thei dawn nghe nghe.
Thawhlehnia Portugal ram aiawha tournament lian khel tur a puanah coach Roberto Martinez chuan a squad kha ‘27 players plus one’ a ti deuh kher a, la dam se World Cup khel tura thlanchhuah ngei ngei tur Liverpool forward hlui Diogo Jota hriatrengna leh chawimawina lam thil a ni.
Nikum July thlaa Spain ram car accident-a thi ta chungchang sawiin Portugal boss chuan, “Ani kha kan chakna leh hlimna a ni. Diogo hloh zet kha chu theihnghilh theih a ni tawh dawn lo a, kha tih lai tluka hun harsa kha a tam lo. A tuk maiah kan zavaiin Diogo lo dream thin tipuitling tura kan chetchhuah a ngai a, tunah awm tawh lo mah se tun thleng hian kan national team hawiher hriltu a la ni zui zel.
“Diogo Jota thlarau, a chakna thahrui leh example a nihna hi kan squad baka plus one kan neih chu a ni a, he squad-ah hian hlimthla angin a tel zel ang,” a ti.
Portugal squad-ah hian tun Pathianni Manchester United final game zawh ruala Old Trafford chhuahsan ve tawh tur Bruno Fernandes pawh telin, Premier League season kal laia assist ngah ber bakah hian Paris St-Germain star pali – Vitinha, Joao Neves, Nuno Mendes leh Goncalo Ramos an tel.
May ni 30 khian PSG hian Champions League final-ah English champion thar Arsenal an tum dawn a, he hunah hian an Portuguese player plaite hi an inhliam lo turah beisei phawt ang!
Portugal hian June ni 17 khian World Cup bul an tanna inkhelah DR Congo chu Houston khawpuiah an tum dawn a, chu mi hma friendly match-ah Chile leh Nigeria an infiampui phawt ang.
Houston khuaah vek hian Uzbekistan an tum bawk dawn a, Group K campaign kharnaa Colombia an hmachhawnna tur khelmual chu Miami a ni thung.
Portugal World Cup squad
Goalkeepers: Diogo Costa (Porto), Jose Sa (Wolves), Rui Silva (Sporting), Ricardo Velho (Genclerbirligi).
Defenders: Diogo Dalot (Manchester United), Matheus Nunes (Manchester City), Ruben Dias (Manchester City), Nelson Semedo (Fenerbahce), Joao Cancelo (Barcelona), Nuno Mendes (Paris St-Germain), Goncalo Inacio (Sporting), Renato Veiga (Villarreal), Tomas Araujo (Benfica).
Midfielders: Ruben Neves (Al-Hilal), Samu Costa (Mallorca), Joao Neves (Paris St-Germain), Vitinha (Paris St-Germain), Bruno Fernandes (Manchester United), Bernardo Silva (Manchester City).
Forwards: Cristiano Ronaldo (Al-Nassr), Joao Felix (Al-Nassr), Francisco Trincao (Sporting), Francisco Conceicao (Juventus), Pedro Neto (Chelsea), Rafael Leao (AC Milan), Goncalo Guedes (Real Sociedad), Goncalo Ramos (Paris St-Germain).