Daily Newspaper

A vawikhatna atan Rome final-ah Halep chak

6

Kum 2017 leh 2018 Italian Open final-ah a tlawm tawh a, tun Pathianni khan Simona Halep chuan a vawikhatna atan Rome title a hlawh-chhuak ve ta nge nge a, karleh atanga khelh tan tur French Open inbuatsaihna warm up tournament-a hnehtu a nihna hian Roland Garros-a a huhang pawh a tina zual khawp ang le!

Thawhtanni Rome final-ah top seed Halep hian 6-0 2-1-a hma a hruai mek laiin a tumpui Czech second seed Karolina Pliskova chuan hliam avangin a khelh chhunzawm thei ta lo a, hahdam zawkin title a hlawhchhuak.

Tan phat atangin big-hitting Pliskova che vel kha a hnufum deuh tih a hmuh theih a, khelmual sira enkawl a nih hnuah pawh inkhel chhun-zawm thei dinhmuna a din tak loh avangin Halep tan trophy a hmin zui ta a ni.

Kum 2018 French Open title latu Halep hian a zawnin match 14 hnehna a chang tling ta a, Paris khawpuia grand slam khelh chhunzawm leh turah pawh hian champion tum tana paltlang ngai hraw berte zinga pakhat a ni ngei ang.

Kumin French Open-ah hian coronavirus avanga Australia thlawhluh tum lo defending champion Ashleigh Barty a inlan theih dawn loh avangin Halep hian top seed a chang dawn a, reigning Wimbledon champion hian a vawithumna atan grand slam title a hlawhchhuah a rinawm hle a ni.

A la champion ngai lohna Italian Open-a chak a lawm leh theih tak hnuin Halep hian a career-ah WTA title 22 a la tling ve ta chiah a, clay court bikah chuan a vawikaw champion-na a ni.
Italy ramah chungnung takin inlan bawk mah se Roma-nian Halep hian Rome final-ah khan fiahna tak tak a hmachhawn zo ta lo a, a tumpuinu kha na nei a nih tlat avangin player khawng zawk laka a dinhmun tur diktak hi sawi mai a la harsa rih deuh niin a lang.

Inkhelh zawhah Halep chuan Pliskova lam hawiin, “Hetiang hi tour-nament kan tlingtlak dan tura kan duhthusam a ni hauh lo mai. Tunkar hian ropui takin i khel a, ngai i awh chhoh leh thuai ka duh a, French Open atan pawh duhsakna ka hlan che a, chutah chuan final-ah pawh kan intawng leh mahna,” a ti.

Tarlan tawh angin, Rome defending champion Pliskova khan set hnihna tan hmain physio a ko a, a hnungzang hnuai lam na kha enkawl a ni chungin set hnihnaah rei a ding zo ta chuang lo a, a inhnuhdawh hnuah a tawp dan chu lungawithl^k loh teh mah se a tumpui Simona kha a khawng mah mah tih a zep duh bik ta lo a, “Ani nena match tha tak khel turin 100 percent-a in fit tur ka ni asin maw le…” a ti vang vang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy