Daily Newspaper

A vawtuin ek cheh ve tho

POST NEWS SERVICE

9

Assam-in Mizoram pawhtu kawngpui pawimawh an dang a, hei hi Mizoram chauh ni lovin a dangtu lam pawhin an tuar ve tho.

Vairengte pawhtu leh Kanhmun pawhtu kawngte an dang a, national highway ve ve a ni. Chung kawngpui pahnih paltlang Assam khuate chu sumdawnna lamah a nghawng mek a, lirthei khalhtute a nghawng bawk; lirthei khalhtute phei hi chu Assam mi pawh ni lo, state dang daiha mite an ni fur.

Silchar leh Lailapur inkarah Mizorama luh tum lirtheite hi an ding a, chung lirthei khalhtute chu ram hla tak taka mi an ni hlawm.

Hindustan Times-in August ni 3-a an ziah danin, Sonai Road, Nagatilla, Sonabarighat, Dholai velah chuan lirthei enkawltute’n kawng sirah eirawng an bawl a, a then chuan sum an harsa tan tih an sawi. Rajasthan mi, truck driver Mukes Kumar Jat chuan, “Pawisa kan nei lo tan, ei tur pawh… Kawngah tiang hian ni ruk kan tang ta a. Kal kan duh tawh,” a ti.

Sumdawngte a nghawng dan pawh Hindustan Times hian an ziak a, Dholai-a Channi Ghat-ah chuan Thawhtanni kha bazar ni a nih thu leh, Mizo nena an insumdawn tawn theih loh avanga an sumdawnna a tlakhniam thu te an ziak. Covid-19 vangin Mizote nena an insumdawn tawnna hi a tlahniam phawt a, chumi hnu-ah ramri chungchanga buaina an tuar leh tiin an ziak a ni.

Dholai police station bula Aizawl FC (Mizo Dawr) neitu, Bengali-pa tawngkam an tarlang a, “Mizo tawng ka hmang thei a, Mizoramah thian ka nei teuh… Sorkar policy hi mi hniam zawkte’n an tuar mek a ni,” a ti.

Karimganj District atangin tun hnaiah Tripura-ah bungrua a lut nasa a, Assam lamah Tripura-in Mizoram an sumdawnpui vang tia ngai an awm. Tripura pawhtu kawngpui te pawh an dang hial. Thawhtanni tuk lamah pawh khan an la dang a, chumi hnu-ah chuan an dang tawh lo. Chutih laiin Damcherra lam chuan Mizoram nena insumdawn tawn an la tum hle.

Damcherra hi Langkaih kam khua, Tripura lam an ni a, Mizoram lamah Kanhmun a awm. Thawhlehni hi bazar ni a ni a, Langkai kam lehlam lehlam chu sumdawnna hmun lian a ni thin. Mizoram leh Tripura leh Assam lam atangtein chumi ni chuan thil an zuar a, an bazar thin bawk. Mahse hrilen hnuah bazar ni hi a awm thei ta lo a, Mizoramin a ti ngai tawh lo. Tripura lamah chuan an la ti a, Thawhlehni pawh khan an bazar luih luih.

Damcherra hian Kanhmun bakah Assam lam pawh an hnaih a, tun hnaia Assam lamin Tripura pawhtu kawngpui an dan kha Damcherra pawhtu, an kawngpui pawimawh niin, Assam atanga bungrua an lakna, Assam piah state dang nena an insumdawn tawnna kawngpui a ni. Chu kawngpui chu Assam lamin an dang a, Tripura laka lungawi loh thu te an aupui. Chutiang a nih lai chuan Thawhtanni, August ni 2 zan khan Damcherra-a Bazar Committee chuan Kanhmun VLTF hnenah a hma ang bawka bazar ni siam leh an rawt a, ziakin an thlen.

Kanhmun VLTF hruaitute chuan Bazar Committee hian Covid-19 chungchangah pawh sumdawngte himna tur ngaihtuah an inhuam thu thlengin an lehkhaah an ziak tih a sawi. Assam-in Tripura-in Mizoram a pui ang tih an hlauh tih a nih laia Damcherra lamin bazar ni siam leh an rawt mak an tih thu VLTF hruaitute chuan an sawi. Damcherra lamin hetiang hian rawt mah se August ni 3 bazar ni-ah chuan Mizo an tel chuang lo.

Kanhmun pawhtu national highway pawh Assam lamin Medili lui kamah an dang a, July ni 26-a silai a puah khan, a tukah police-in kawng hi an dang nghal.

Nikum khan ramri chungchang buaina avangin Assam hian ni 26 vel kawng an lo dang tawh a, khami tum khan Medili lui kamah pawh hian kawng hi an dang. Mahse Karimganj lam hian Mizoram khawthlang lam atangin thil an chawlut nasa a, mai, hatkora, sawhthing leh kuhva an lei thin. Nikuma kawng an dan lai pawh khan Mizoram mai, hatkora leh sawhthing lei an mamawh si a, a kawng dangtu lam mah ni se an sumdawngte’n a theih ang angin Mizoram tharchhuah thilte chu an lei ta tho. A hnu lawkah kuhva lei a hun leh a, Mizorama inkhung hran (quarantine) pawh huamin an rawn lei.

Karimganj lam sumdawng thenkhat chuan tunah pawh hian kawng dan hi an thlawp lo a, district danga thil thlengin a nghawng ve chu dik an ti lo tih thu dawn a ni. Mizorama an sumdawnpuite bulah pawh thenkhat chuan an sawi a, an sumdawnnain a tuar tih te, kawng dan an thlawp loh thu te hi an sawi tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy