Tennis legend Novak Djokovic chuan Olympic dream a tihpuitlin hnuah gold medal nen an ram a thleng a, Serbia khawpui kawtthlerah fans sang tam takin an pasaltha ram chhuak salu hawn hi an lo hmuak.
Big four ral mek laia superstar thar tur rawn inlar tan mek Carlos Alcaraz hneha a la ban phak ngai loh Olympic hlawhtlinna chang thar Djokovic-a haw hian an veng lamah ‘hero welcome’ a hlawh a, Grand Slam title 24 a lak tawh belhchhaha Olympic gold medal a sualchhuah leh tak hnu hian tennis player ropuibera ngaitu an pun belh sauh a ni.
Novak Djokovic hian an ram lama an lo hmuah dan video hi X lamah dahchhuakin, a caption-ah, “A golden homecoming. KOD KUCE JE NAJLEPSE.” tih a dah nghe nghe.
He post hian ngaihven a hlawh nghal hle a, French footballer hlui Patrice Evra chuan Instagram kaltlangin comment a pe, “Mihring mihrinna kawnga mihring tha ber leh infiammi tha ber ni bawk, a hlutna theihnghilh ngai lo mi, bansan ngai lo, sawrkar a ni emaw eng thil dang mah pawhin a ngaihdan sawhsawntir ngai lo mihring hian zah a phu a ni,” tiin.
Kum 37 mi ni tawh chungin Djokovic Olympic record thar siamin, kum 1988-a tennis-in Olympic Games-ah hmun a chankir leh atangin Olympic singles gold medalist upa ber a ni a; a tumruhna leh dawhtheihna, nghah hram hramna hian khawvel pumpuia a fan-te rilru a hneh hle a ni.
Covid 19 invenna a lak duh loh avanga Australian Open a khelh theih loh boruakte kha a hun lai chuan hnual rawihna tur niin lang mah se ngawi rengin a ngaihdanah a ding a, dawhthei takin a arhchhuah leh hun tur a thlir a, vawi duai lo a lo hlawhchham tawhna Olympic-ah gold medal a hlawhchhuak leh ta nge nge a, tennis mai ni loin infiammi (athlete) piangchhuak tawh zawng zawng zinga ropui berah mi tamtakin an ngai pawh hi a awm lo hran lo ang!
A vengte’n Djokovic hmuak ropui
