Nimin khan Lunglei North bialtu MLA leh HPC vice chairman ni bawk V. Malsawmtluanga chuan HPC Office, Lungleia a office chamber-ah India rama infiamna hmanga Mizote tihmingthatu ni mek Mizo footballer chhuanvawr Lallianzuala Chhangte chawimawina hun a buatsaih bakah thingpui inpuiin, inkawmna hun tha tak an hmangdun bawk.
MST-a chuan Zuala a ngaihsan thu leh tet te atanga Pathian tih tlat mi a nih thu sawiin, a thilithnaah midangte aia hlawhtlin tuma bei tlat mi leh taima tak a nih thu a sawi a; Lunglei chhulchhuak zinga Mizote tihmingthatu an nei chu lawmawm a tiin, a chhuan takzet thu a sawi.
All India Football Federation (AIFF) Player of the Year for 2022-2023 a lo nih tawh thu sawi bawkin, kuminah pawh hian AIFF Player of the Year a nih leh ngei a beisei thu leh a duhsak thu a tarlang tel.
Lianzuala Chhangte pawhin thu sawiin, HPC vice chairman MST-a chu naupan tet atanga football tuipuitu leh nasa taka amah ngei pawh fuih thintu a nih thu sawi chungin, lehkha zir ngawr ngawr ni lo duhthlanna dang siam thei tura fuihtu a nih thu a sawi bawk.
Zuala chuan, “Tun dinhmun ka thlen theihna’na ka tana mi pawimawh tak a ni,” a ti.
India international Lianzuala Chhangte chuan an MLA chu Mizoram leh Lunglei tana a vision leh dream-te ti hlawhtling thei tura tun dinhmun a thlen theih avanga a lawmpui thu hrilh chungin a dream-te tihlawhtling ngei turin duhsakna a hlan nghal.
HPC vice chairman chuan India rama football league sang ber Indian Super League (ISL) 2023-2024 season khelh zawh taka Mumbai FC champion-puitu player pawimawh tak leh Mizo tihmingthatu, Indian player zinga season khat chhunga goal khung tam ber a nih thu sawi chungin Lallianzuala Chhangte hnenah lawmpuina thuziak a hlan.
A vengte’n Zuala an chawimawi
