US sipaite chuan Iran-in Strait of Hormuz-a lawng kalte an beih theihna ‘tihchak loh nan’ an kah chhunzawm tih an sawi.
A zawna zan 10 nana an kah hma lawk hian US President Donald Trump-a chuan US sipai thite laka phuba lak nan Iran lakah hremna pek a nih tur thu a sawi a ni.
A chhan let nan Iran pawhin tuialhthei phur lawng pahnih bakah Bahrain, Kuwait leh Jordan-a US sipai hmunte an kap ve tih sorkar news agency IRNA-in a tar lang.
President Masoud Pezeshkian-a chuan Iran hian US nen ‘indona tak tak’ a kalpui mek tih a sawi a. A hma lawkin Trump-a chuan tun hnaia Jordan-a pahnih leh Iraq-a pakhat an sipai thite ‘zahna lantir nan’ Iran chu ‘na takin’ an chhu dawn tih a sawi.
US Central Command (Centcom) chuan Iranian ‘sipaite command centre, tuipuia an chet theihna, missile leh drone kah chhuahna hmun leh air defence system an kap’ tih an sawi.
Hmarthlanga Tabriz-ah thil puak ri a awm a, sorkar chanchinbu chuan mi pakhat thiin tam takin hliam an tuar niin a sawi a. Gulf lawng chawlhna Bandar Mahshahr leh Bandar Imam Khomeini leh chhimchhaka lawng chawlhna, Chabahar leh Konarak-ah thil puak a awm bawk.
Centcom chuan Strait of Hormuz-ah sumdawng lawng an kal zel tih a sawi bawk.
Hetih lai hian Iran chuan an sipaiten tuialhthei phur lawng pahnih, strait-a ‘chhim lam him lo leh thil tha lo awmna lai’ kaltlang tum an kap a, rescue team-ten thawktute an chhanchhuak zui tih sorkar chanchinbuin a tar lang.
United Kingdom Maritime Trade Operations agency (UKMTO) pawhin Strait of Hormuz-ah hian lawng pakhat chu eng thil emaw hmanga kah fuh niin thawktuten an kalsan a ngai a, lifeboat-in an insaseng tih an sawi a. Hei hi Iran-in a kah a sawi hi a ni em tih hriat a ni lo.
Thawhtanni khan tuialhthei leh bungraw phur parukin Strait of Hormuz hi an paltlang niin maritime intelligence firm Kpler chuan a sawi a. Pahnih hi a hmaa US-in Iran nena inkungkaihna nei nia hria a hrekte an ni.
Iran-a Islamic Revolutionary Guard Corps (IRGC) chuan Bahrain-ah US compant Amazon data centre chu an kap bawk niin sorkar chanchinbu chuan Thawhlehni khan a tar lang.
Jordan chuan Thawhlehni khan Thawhtanni zan tlai tawh takah drone panga an lo dang a, missile pathum an kap thla bawk tih a sawi a. Bahrain pawhin Iran hian air navigation system kah an tum a; mahse, harsatna a thlen lo niin an sawi a. Kuwait-a sipaite pawhin Iranian drone an lo kah thlak thu an sawi.
Thawhtanni zan khan US Department of Defense chuan kartawpa Iran-in Jordan-a Muwaffaq Salti base an kahnaa an sipai thite a puang ac. Pte Isabella Gonzales, 19, Texas leh Lt Tyler James Feehan, 25, Hawaii an nih thu a sawi.
Centcom chuan pakhat chin hriat loh a awm tih a sawi a, ruang pakhat, la finfiah loh erawh an hmu tawh.
A zawna zan 10 nan US-in Iran kap, Tehran-in chhang ve zel
