Lengpui Airport enkawl chungchangah Airport Authority of India chuan zirchian hmasak a tum a, team an rawn intir. Thawhlehni khan chief minister Lalduhoma hoin an inkawm a. Airport Authority of India (AAI) member (Operations) Dr Sharad Kumar, NER regional executive director M Raja Kishore leh midang an lokal.
Chief minister chuan, tunhma atang tawhin AAI kuta Lengpui Airport enkawl hna hlan tuma hma lak a ni thin a. An sawrkar pawhin ngaihven nghal mah se, an beisei angin thil a kaltluang loa, duhthlan tur dang, Mizoram tana tha tawk tak a awm bawk si avangin chu’ng mite nen chuan an indawr ta tih a sawi.
Tunhnaiah Union Home minister Amit Shah nen an inkawmnaah AAI nena indawrna tharthawh leh tha an ti a. Heti hian an indawr thar leh tih sawiin, “Han zirchiang ula, in thu leh hla azirin kal zel dan tur kan sawiho dawn nia,” a ti.
Union Home minister leh chief minister-in AAI kuta airport hlan chungchanga inbiak thar an rel hnu hian commissioner & secretary to CM (GAD) Vanlaldina Fanai chu April 16 khan Ministry of Civil Aviation secretary leh AAI hotute nen an thukhawm a. Heta an ruahman angin AAI Team hian Mizoram an rawn tlawh a ni.
AAI hotute hian Lengpui Airport tih changtlun nghal ngai zual nia an hriat leh hma an lak zel dan tur chief minister hnenah hian an sawi a ni.
AAI-in Lengpui Airport zir dawn
