Aam Aadmi Party leader Manish Sisodia lawyer te chuan Enforcement Directorate te chu dan kalphung namnula mi man chu right anga ngaiah an puh a.
ED te hian Delhi Deputy CM hlui Sisodia chu Delhi liquor policy kaihhnawiha pawisa chheprelhna tia an sawiah ni 10 chhung thu zawhfiah atan kawl an dil leh a ni. CBI tena an man hnua special court-in a bail dilna a ngaihtuah hma ni hian ED te chuan Sisodia hi Nilaini khan an man leh zui a.
“Agency tena mi man hi right anga an ngai hi fashion anga ngaih a ni ta. Hetianga an duh ang thala entitlement a an ngai ringawt hi court-in a hrawk a ngai ta a ni” tiin Sisodia lawyer Dayan Krishna chuan special court hnenah a sawi a.
“CBI ten thiltihsual nia an ngaih an chhui chiang mek a, chutih laiin ED ten eng nge CBI case ah sawi tur an neih ve ngawt. ED te hian Prevention of Money Laundering Act an chhui thei lo” tiin Krishna chuana sawi a.
AAP leader’s lawyer chuan Delhi liquor policy file chuan Lieutenant Governor pawh paltlangin a pawmpui a ni, tia sawiin, “ED te hian Lieutenant Governor pawh thu zawtfiah rawh se,” a ti bawk a.
Sisodia ni 10 kawl an dilna chhan sawiin ED chuan Delhi liquor policy case a sum kaihhnawih bothlau chu Rs 292 crore lai a ni a ti a. “Officer te kan ko tawh a, custody ah Sisodia te nena inhmachhawn tir kan duh a ni,” tiin ED lawyer chuan a sawi bawk.
AAP-in dan namnulah ED an puh
