Zirtawpni Serie A inkhela AC Milan goal thum hi chawlhlawk hmaa Alvaro Morata, Theo Hernandez leh Christian Pulisic-te thawhkhawm niin, minute nga chhunga lut vek a ni.
Naktuk zan Champions League-a Bayer Leverkusen luhkhung tur Milan hian bul tan tha vut lo mah se minute 38 a herchhuah rualin Morata chuan Hernandez-a free-kick hmangin goal hmahruai a tauhlut a, hei hi Milan tana a goal hnih thunna niin, Torino nen season bultanna inkhela 2-2-a an inhnehtawk tum khan Spain striker hian tun season-a a goal hmasa zawk a khung.
Minute thum an khel tling leh tihin Hernandez chuan Rafael Leao siamsak atangin Milan goal hnihna a thawh a, ti hian, goal 29 tilut tlingin French left-back hian Serie A history-a defender ni chunga Milan tana goal khung hnem ber Paolo Maldini record a tluk ta a ni.
Chawlhlawk hma minute hnih chiah awm tawhah Tammy Abraham chuan goal ban a petper a, chu ball perlet hmang chuan Pulisic-a’n sithum faia Milan hmahruaina leh he inkhela goal lut hnuhnungber ni zui ta a thawh ve leh.
Lecce lam hian counter-attack hmanga an siphurh sut tumin tan an khawh ve reng a, chance pawh an hmu chho deuh reng a, hun pumin goal thun tum hian tum 16 ngawt ball an thawnlut a, attempt vawi 15 nei Milan nena an danglamna chu an hun tha hmuh an hmangtangkai zo ve ta lo kha a ni.
Mualneitu Milan lam pawhin goal thum neih tawha lungawi mai tum bik loin second half-ah pawh an nawr chhunzawm reng a, an central midfielder Ruben Loftus-Cheek chuan a khungbelh teuh hle a, goal kham a petper.
Minute 80-ah Hernandez thlaka khelmual a luh atanga minute ngana lekah Lecce winger Lameck Banda a kalhtluk avangin Milan substitute Davide Bartesaghi hnawhchhuah a ni a, mahse, Lecce-in a tam zawk ni chungin goal an khung zo ta chuang lo.
October ni 5 zan khian San Siro ngeia Serie A game-a Milan hneh thei hnuhnungber ni mek (October 1997-a 2-1-in an hneh) Lecce hian palina luahtu Udinese an luhkhung ang a; AC Milan October ni 6 league game-ah Fiorentina an tlawh ve thung ang.
AC Milan 3-0 Lecce
