February 14, Thawhleh zan khan UEFA champions League last 16, first leg khelh tan a ni a. Italian champion AC Milan chuan San Siro-a an mikhual Tottenham Hotspurs chu si khat faiin an lo hneh a, pen khatin quarter-final an hnaih. Milan mualah tlawm tawh mah se Spurs hian an mualah hneh let in, AC Milan hi hneh let an tum ngei dawn.
Italian Serie A champion AC Milan hian english club lian Tottenham lakah bul an tan tha a, goal an thun thuai. Inkhel tan atangag minute sarihna lekah Brahim Diaz chuan tha zetin a tauh a, a ball tauh tha tak hi Tottenham si nghak Fraser Forster chuan lo dan zet mah se ball ber let leh hi goal ah a chantir ta tho thung a, hmahruaina goal a thun.
Hma takah goal an thun vangin AC Milan hi inrintawkna sang zawk nen an mualah an inlan zui a. Goal thun belh theihna hun tha nei bawk mah se Spurs si nghak Fraser Forster an paltlang thei tawh lo thung. Milan tan hian ball chang tlem zawk ni chungin an mikhualte an nawr let thut thin a. Theo Hernandez leh Rafael Leao ten goal thun theihna hun tha an nei a, an hun tha neih an chhawr tangkai zo tawh lo. An hun tha hloh a, goal tam zawk an thun theih loh vangin Milan hi an dinhmun a derthawn phah a. London khawpuiah fiahna hautak zawk an hmachhawn zui leh a ngai dawn. Milan tan Tottenham muala len luh hi thil chakawm tak a ni dawn hauh lova, quarter-final lut turin hna hautak tak an thawh zui leh a ngai dawn.
Hma taka goal an chhuah vangin Tottenham khel a buai det a, ngaiawh turin an nghah deuh det a ngai. Antonio Conte team te hian ball chang tam zawk mahse AC Milan tlarhnung inrem phui tak an thiat hleithei meuh lo. Mual laiah Spurs midfiedler pahnih; Oliver Skipp leh Papa Matar Sarr te an khel tha in, an hmuhnawm dun viau a. An ni pahnih hi chetha dun viau mah se an tlarhma player te tan goal thun theihna hun tha pe thei bik lo. Ball chang tlem zawk ni mah se mualneitu Milan hi hlauhawm zawkah an tang zui zel a, Charles de Keteleare leh Malick Thiaw ten tauh loh theihna hun tha an neih chu ho taka hlahin, goal goal zawnah ball an tauh thei lo ve ve a, uiawm takin an hun tha an hlah. Tottenham mualah tlawm a, quarter-final an lut zo lo a nih chuan San Siro-a an hun tha hoh zozaite hi an ngaihtuah let leh ang a, siam that theih ni tawh si loah an la hui pap pap ngeiin a rinawm.
AC Milan lakah an tlawm leh tak vangin London club lian Tottenham in hun harsa an hmachhawn mek. Inrinni zan khan Leicester City lakah 4-1 ngawta tlawmin an lo mualpho tawh a, Champions League lamah result tha an beiseina a thlawn leh bawk. Spurs hi champions League-ah an champion lo a nih a, EPL ah palina an ni phak lo a nih bawk chuan season tharah champions league an khel phak dawn lo. Europe a football club te inelna hlu ber UCL-ah an tel phak lo a nih chuan an club tana goal thun hnem ber Harry Kane an chan ngei a rinawm. Tottenham tana goal thun hnem ber Kane hi EPL club lian ten lak an duh a, Bayern Munich leh Real Madrid te pawhin an ngaihven viau niin tarlan a ni bawk. He forward tha tak hian a ropui leh zual nan trophy chawi a mamawh a, trophy chawi turin club lian zawk a pan nge nge a rinawm sawt viau a. Kane a chhuak a nih chuan Spurs tan inelna liana champion a huphurhawm viau tura ngaih a ni.
San Siro-ah si khat faiin tlawm bawk mah se Tottenham tan quarter-final luh beiseina sang tak a la awm. March ni 8 zan khian an khelmualah AC Milan nen hian an inhmachhawn nawn leh dawn a. An mikhualte lehthal theihna hun tha tak an nei a, AC Milan hneh let turin an theihna sang ber an hlan ang.
AC Milan in Spurs an hneh
![](https://theaizawlpost.org/wp-content/uploads/2023/02/cc.jpg)