Daily Newspaper

Academician ten JEE-NEET exam kalpui ngei duh

13

India ramchhung leh pawna university hrang hranga academician te chuan Prime Minister Narendra Modi hnenah lehkhathawnin medical leh engineering entrance exam – JEE-Mais leh NEET te tihkhawtlai zel chuan zirlai te hmalam hun a tihchhiat theih thu an hrilh.

Covid-19 kai pun zual zel laia heng exam te kalpui loh ni se tia sawi nasat chungchangah academician te chuan an lehkhathawnah, “Mi thenkhatte chuan an political agenda kalpui chak theih nan zirlaite hma lam hun an khel a ni,” an ti a.

“|halai leh zirlaite hi he ram hma lam hun te an ni a. Mahse, Covid-19 pandemic laia thil chiang lo tam tak awm laiin an career pawh a chiang lo hle. Admission leh class chungchangah hlauhthawnna a awm a, hengte hi a rang thei ang bera chinfel tur a ni,” tiin lehkhathawn an ziahah chuan an tarlang bawk.

Kum dang ang bawkin kuminah pawh zirlai nuai tel te chuan Class 12 exam hlawhtlingin an Inah an kal zel dan tur nghakin an awm mek a ni, tiin lehkha thawn chuan a sawi bawk.

“Sorkarin JEE-Mains leh NEET exam ni tur a puang tawh a, exam hi sawn hlat leh zel a nih chuan zirlaite kum hlu lutuk engmah lova siamna a ni ang. |halai leh zirlaite duhthusam te kan tihlawhchham tur a ni lo. Mahse, mi thenkhatte chuan zirlaite hma lam hun hi an political agenda tihhlawhtlin nan leh sorkar hnial nan an hmang duh a ni,” tiin an ziak bawk.

He lekhathawna hming ziaktu zingah hian Delhi University, IGNOU, Lucknow University, JNU, BHU, IIT Delhi bakah Foreign university heng University of London, University of California, Hebrew University of Jerusalem leh Ben Gurion University, Israel leh ram dang danga Indian academician te an tel.

“Central sorkar hian JEE leh NEET exam hi fimkhur tak chungin zirlai te hma lam hun thlir tlat chungin hlawhtling takin a kalpui theih kan ring tlat a ni,” tiin an ziak bawk.

National Testing Agency (NTA) atangin medical leh engineering entrance tum admit cards 14 lakh download a ni tawh a. Nilaini khan BJP rorel lohna state chief minister te chuan inthurualin Supreme Court hnenah heng exam te hi thulh rih ni se tiin thu an thlen a ni.

Exam huaihawt leh huaihawt loh hi thla kalta atang tawha inhnialna siam nasatu niin ngaihdan a inang lo nasa hle a, exam neih a nih loh chuan zirlai te tan academic kum hloh a ni dawn tia exam kalpui duh an awm laiin opposition leh activist thenkhatte chuan Covid-19 avanga sawn hlat an duh zawk thung.

NEET hi September 13-ah exam neih tura duansa niin engineer entrance exam JEE Main chu September 1-6 inkara neih tuma ni thung a. JEE-Mains atan hian candidate nuai 9.5 vel awmin NEET atan hian nuai 15.97 vel an awm thung.

Heng exam te hi novel coronavirus leng avangin tum hnih a hun sawn a ni tawh a.

JEE-Main hi April 7-11 a neih tum kha niin July 18-23 ah sawn a ni tawh a, NEET-UG hi May 3 a neih tum niin July 26-ah sawn a lo ni tawh bawk a. A tum thum nan September thlaa neih tura sawn a ni leh tawh a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy