Forbes-in Hollywood changtunu te zinga hlawh hnem zual list an tihchhuah tharah Sofia Vergara chu No.1 a ni. Sofia Vergara hi TV star hmeichhe zinga hlawh tam ber pawh kum 10 vel zet a lo ni tawh a, tuna Hollywood changtunu te zinga hlawh tam ber a rawn ni ta pawh hi a mak hran lo.
Forbes hian June 2019 leh June 2020 inkara a changtunu te hlawh chhuah an chhut atangin he list hi an siam a ni a, list-ah chuan lemchan atanga an sum lakluh bakah fakna leh sumdawnna dang atanga an sum lakluh te pawh chhut tel vek a ni.
He thla 12 chhunga actress hlawh tam zual 10 te hlawh belhkhawm chuan kum hmasa hlawh tam zual 10 te hlawh belh khawm chu 20% vel zetin a pha lo tlat mai a, hei hi kuminah coronavirus hripui lengin TV leh movie industry a tih tawp deuh thup vang niin an sawi.
Sofia Vergara hian June 2019 leh June 2020 inkarah dollar maktaduai 43 a thawk chhuak hman niin Forbes chuan an chhut a, a sum lakluhna lian zingah America’s Got Talent judge a nih avanga a hlawh, fakna leh a jean collection Walmart nena an sumdawnna te chu a langsar zual an ni.
Angelina Jolie chu No.2 niin, dollar maktaduai 35.5 lalut angin an chhut a, Maleficient: Mistress of Evil leh Come Away te chu a sum lakluhna lian zingah a tel a, hei bakah hian Marvel film siam thar tur The Eternals nena an inremna chu a sum lakluhna lian ber niin an tarlang.
Wonder Woman changtunu Gal Gadot chu No.3 niin, dollar maktaduai 31.5 thawk chhuak hman angin an chhut a, a sum lakluhna lian ber chu Netflix nena an thawh dunna ‘Red Notice’ niin, he film atang ringawt hian dollar maktaduai 20 a lalut niin an chhut.
(THE AIZAWL POST – Thalaite Huang)
Full>> ePaper Subscribe
