Adani Group Chairman Gautam Adani chu khawvela mihausa ber ber 25 zingah a lang pha tawh lo va, tun hnaiah a hausakna chu $43.4 billion laiin a tlahniam niin Forbes leh Bloomberg te chuan an sawi a. Adani te share tlakhniamna chhan hi US short-seller Hindenburg Research tena Gujarat-based conglomerate te chu stock manipulation leh accounting fraud kalpuiah an puh vang a ni.
Adani hian tun hnai lawkah Asia khawmualpuia mihausa ber leh khawvel huapa mihausa ber pathumna nihna a chelh hman a, mahse, tun hnaiah a hausakna chu nasa taka tlahniamin khawvel billionaire hausa tawn taw zingah 26-naah a tlahniam ta niin Forbes te chuan an sawi bawk.
Nilaini khan Adani Group stock chu hralh belh niin hei vang hian Adani chuan $ 3.6 billion a hloh phah zui a, hei vang hian Nike neitu Phil Knight leh a chhungte chuan Adani hi khumin 25-na an nih zui phah a, an hausakn belhkhawm chu $ 46.3 billion hu vel a ni.
Adani hian kumin kum bulah $ 121 billion neiin bul atan a, khawvela mihausa ber pathumna a ni hman a ni. Chu mai a ni lo Tesla leh SpaceX CEO Elon Musk pawh khuma mihausa ber pahnihna ni thei mai tura ngaih a ni hman bawk a. Mahse, February 1 khan Adani chu hausa lam thenaah 10-naah tlahniam zui nghalin, Reliance industry tycoon Mukesh Ambani hnuaiah tlain Ambani chu Indian hausa ber a ni leh zui a ni.
February 3 a nih meuh chuan Adani chu khawvel mihausa top-20 pawnah awm hman derin a hausakna chu $ 58 billion velin a tlahniam hman a. Tunah phei chuan Forbes leh Bloomberg tena real-time billionaires lists an siamah 25 pawn lamah a awm mek a ni.
Adani hian February 2022 atang khan India mihausa ber nihna a chelh a, Covid-19 pandemic len laiin a hausakna namen lova pungin $ 42.7 billion velin a hausak belh hman a, khawvela mihausa ber pangana-ah a inhlangkai nghal thei a ni. September 2022 khan $ 156.3 billion neiin khawvela mihausa ber dawttu a ni hman bawk. Mahse, January 24 khan Hindenburg Report tihchhuah niin chutah chuan Adani Group te chu stock manipulation leh accounting fraud tia puh niin Adani Group tena an insawifiah viau chungin awmzia a nei pha ta lo ni.
Market lamah che chhe zui zelin investor tena rinna an nghah ngam loh avangin Adani Group te chuan January 24 atang khan market capitalisation lamah $ 135 billion an hloh hman der a ni. Adani Group company Group 10 lai – Adani Ports, Adani Green Energy and Power te pawh tel vekin tunkar khan an hlutna belhkhawm chu $ 100 billion hnuaiah a tla thla bawk.
Adani Group-te khawvel mihausa top 25-ah lang pha tawh lo
