Site icon The Aizawl Post

Adani hausakna tlahniam

Indian billionaire Gautam Adani hausakna chu kar kalta Zirtawpni khan $20 billion lawihin a tlahniam a, hei hi a chhan chu a company a investor tena US investment firm ten Adani te chuan dik lo takin thil an ti tia an sawi avanga an investment an hnuhdawh vang a ni.

Adan group chuan he report hi intihchhiat tumna tia sawiin mahse an chhanna chuan investor te lung a dum zo meuh chuang lo.

India rama opposition party lian te chuan Adani te chu chhui chian an phut nghal a. Adan group-te hian market value-ah $ 50 billion vel an hloh nghal a ni.

Kar kalta Zirtawpni khan Adani Ecterprise firm share te chu 20% in a tlahniam nghal a, Adani group public listed firm dangte pawh tlahniamin harsatna nasa tak an tawk zui a ni.

Forbess rich list-ah chuan Adani chu khawvela mihausa ber pathumna atangin pasarihnaah a tlahniam nghal a, tichung chuan a hausakna chu $ 96 billion hu vel la ni thova ngaih a ni thung.

Adani group-te che chhe taka siamtu hi Hindenburg Research firm te niin ‘shot-selling’ emaw company share price a tlahniam ang tia betting lama specialist te niin Adani Group te chu stock manipulation kalpuiah leh accounting lama dik lo taka inbumna kalpuiah an puh a ni.

Adani hi self-made tycoon niin ports, airports, renewable energy leh industries hrang hrangah te investment a tih atanga mi hausa tawntaw niin tun hnai kum thum chhungin a hausakna chu a zuanin a zuang a ni.

Adan group te chuan Hindenburg te hi court-a khin an tum mai theih thu an sawi zui a. Adani hi Indian Prime Minister Narendra Modi thian tha niin Modi hlawkpui ber leh Adani chu Modi pawhin a hlawkpui tiin an puh thin.
Indian banks tam tak state-owned insurance company te pawhin Adani group-ah hian sum tam tak an puktir emaw investment emaw an ti deuh vek bawk a ni.

“Public domain-ah research fel taka neih pholanin a awm tawh a, India sorkar hian hei hi chhinchhiahin hma a la zui tur a ni,” tiin Priyanka Chaturvedi, Shiv Sena MP chuan a sawi a.

South Indian politician dang KT Ramarao pawhin India investigative agencies te leh market regulator te chu Adani group te operation chhui chiang turin a ngen bawk a.

Mahse, regulator te chuan an chhui chian a rinawm mai lo tiin mithiamte chuan an sawi thung a. “Security and Exchange Board of India chuan complaint mumal tak a lut a nih loh chuan hma a la lovang. Adani Group kaihhnawihah hian complaint mumal a awm tlat lo,” tiin Shriram Subramaniam, InGovern Research managing director chuan a sawi.

Exit mobile version