Lok Sabha member atanga ban a nih hnua press conference a koh hmasak berah Congress leader Rahul Gandhi chuan BJP leh industrialist Gautam Adani te chuan inzawmna thuktak an nei tiin a sawi a. Amah banna chu Adani issue atanga mipui rilru lakpen tumna leh anti-OBC anga dah an tumna tiin a sawi a.
“Zawhna pakhat chauh ka zawt a, chu chu Adani hian shell company a nei a, chutah chuan a pawisa ni hauh lo Rs 20,000 crore invest a ni a. Zawhna awm ta chu tu pawisa nge ni? tih a ni” tiin a sawi.
Rahul Gandhi chuan parliament ah Adani leh Prime Minster Narendra Modi inlaichinna finfiahna chu a pharh thu sawiin mahse a thusawi te chu nawhrehsakin a awm a ni a ti bawk a.
Rahul Gandhi chuan Speaker hnenah Adani hnena airport enkawlna pek a nih theih nana rules siam danglam a nih dan kimchang a pek thu leh mahse speaker chuan a chhan loh thu a sawi a. “Ka thuawite nawhrehin a awm a, Sepaker hnenah lehkhathawnah kimchang takin Adani henna airports enkawlna pek a nih theih nana dan an siam danglam dan ka hrilh a ni. Mahse, Speaker in min chhang let lo” tiin a sawi.
“Minister te zawk chuan dawtin min puh zui zawk a. Speaker hnenah chu’ng dawta min puhna te chhanletna hun min pe turin ka ngen a. A hmuh pawh ka hmu ngei hial a, eng vangin ka thusawi remti lo nge a nih ka zawt a ni. Nui chunga min chhangin i tawngchhuah ka rem ti lo min ti” tiin Congress leader chuan a sawi bawk.
London a anti-india chungchang a sawi tia puhna chungchangah Rahul Gandhi chuan foreign ram te inrawlh tur sawmna thusawi emaw engmah a neih hauh loh thu a sawi a. “A nihna takah chuan, hei hi India buaina a ni a, kan chingfel mai ang ka ti zawk a ni” tiin a sawi bawk.
“Zawhna ka zawt zui zel dawn a. Rs 20,000 crore chu tu ta nge ni? An duh chuan min disqualify thei a lawm, mahse, chuvang chuan ka duapzul emaw ka zam dawn hauh lo” tiin a sawi bawk a. “Mipuite democratic rights humhim turin ka awm a. Lung In tan ka hlau lo. Min la hre lo mai mai a, ka hlau hlawm der lo” tiin a sawi bawk.
BJP tena OBC community te hmusit anga an sawi chungchangah Congress leader chuan communities te ah danglamna a awm lo, tute pawh kan intluktlang vek a ti a. “Bharat Jodo Yatra a ka thusawi kha en let ula, community tin te kan intluktlang vek ka ti nawn fo a ni. Keimahah chuan engmah danglam a awm lo, tute pahw kan intluktlang vek. OBC chungchang lam a ni lo va, zawhna awm ber zawk chu tu pawisa nge tih zawk a ni” tiin Gandhi chuan a sawi nawn bawk.
PM Modi chu Adani issue chungchanga a thusawi leh turah a ‘hlauthawng’ tiin a sawi a. “A mitah a hmuh theih a. Chuvang chuan boruak lakpenna zawng hmasa in tunah min disqualify zui ta a ni” tiin a sawi bawk.
Congress leader chuan Opposition party dang tena an thlawpna avanga lawmthu sawiin, ‘Kan thawkho zel ang’ tiin a sawi bawkt
Rahul Gandhi hian a Twitter bio pawh thlak nghalin ‘Dis’Qualified MP’ a ti zui nghal bawk a. A official Wayanad Twitter account ah pawh ‘Dis’Qualified MP’ a ti zui bawk.
Kum 52 a upa Rahul Gandhi hi court sang zawkin thiam a chantir lo a nih chuan disqualified a nih avang hian kum riat chhung chu member of parliament a ni thei dawn lo bawk a. Rahul chuan appeal a tum thu a la sawi lo chungin Congress te chuan an appeal tur thu an sawi thung.
Adani issue lakpen tumna vang ban ti
