Thawhtanni atanga tan Parliament Winter Session inbuatsaihna atan Pathianni khan All Parliamentary Floor Leaders thutkhawm neih a ni a. Mizoram MP pahnih pawh telin thu an sawi ve ve.
Lok Sabha MP Richard Vanlalhmangaiha chuan Sixth Schedule hnuaia awm Autonomous District Council chhunga MDC thlantlinten anmahni party kalsana party dang an zawm thin avangin ADC sawrkar a ding nghet thei lo tih sawiin, hmarchhak state hrang hrang ADC chhunga MDC-te khuahkhirhna dan, Anti Defection Law siam a tul tih a sawi.
Rajya Sabha MP K Vanlalvena pawhin, India ram state hrang hrang atangin Delhi-ah Parliament Session-a thu pawimawh rel turin an kalkhawm thin a. Chutih laiin rorel mumal awm loa nitin House adjourn a ni reng thin chu ngaimawhawm a tih thu leh Parliament tizahawm lotu a nih thu a sawi a. Kumin Monsoon Session-ah pawh nitin chairman-in House a adjourn thin a, ni khatah vawi thum aia tamte adjourn a ni thin, tiin, tun tum Session-ah chuan member tu pawhin eng thil pawh auchhuah pui se, chairman-in House adjourn loin session hi kaltluan pui theih tul a tih thu a sawi a ni.
ADC tan Anti Defection Law siam a tul tih LS MP-in thlen
