Daily Newspaper

Adele album thar a hnai em ni?

33

British singer, US-ah a hun tam zawk hmang ta rih Adele album thar pawh kumin kum tawp lamah chuan kan ngaithla leh thei tawh dawn niawmin report a awm ve leh ta a, hetihrual hian Adele leh Taylor Swift te an zai dun dawn niawma sawi chu thulengvak mai mai a ni tih a chiang ve leh ta bawk.

Adele, kum 33, hian a 2015 khan a album ’25’ a tichhuak a, chumi hnuah album dang a la tichhuak leh ta lo va, a album palina tur hi nikum October khan 2021-ah tihchhuah a tum ninawmin a lo sawi tawh a, hei vang hian kum tawp lamah Adele album thar hi kan beisei thei tawhin a rinawm. Adele hian album pathum ’19,’ ’21,’ leh ’25’ a lo tichhuak tawh a ni.

Adele album thar hming tur pawhin ngaihven a hlawh leh tan tawh a, tunah hetia a rawn inlar leh tan takah chuan a album thar pawhin thawm a nei tan dawn a nih rinna a lian nghal. Adele hian a album hmasa pathum chu a kum behchhanin, number hlir a hmang a, mahse, a album palina chu a dang tawh ang. Adele hian James Croden-a Carpool Karaoke-a a inlan tumin, “Ka kum behchhana ka album hnuhnung ber a ni tawh ang. Trilogy hi ka duh tawk. A dawt leh chu ‘Adele’ tih deuh tawp a ni ang,” a lo ti tawh a ni.

Adele sawi takah chuan, a rihna kg 40 chuang a paih hnuah a inlar ve leh tan ta a, Milwaukee Bucks leh Phoenix Sun ten Arizona-a NBA Finals an khel a en ve a, coat fual hain a nalh ta zeih zawih khawp mai. Amah a ni tih hre sa lo tan phei chuan hai palh mai pawh awl tak tur a ni.

Adele hi US lamah a inbengbel rih ta deuh a, a rihna a paih hnua TV-a a inlanna hmasa ber pawh NBC show Saturday Night Live niin, hemi tum hian a inti cher ta deuh chu fiamthu thawh nan pawh a hmang a nih kha. A album hnuhnung ber a tlangzarh atangin kum 5 chuang a ni ve leh tawh a, he US show-a a inlanna chhan hi kum 12 kaltaa America-a a lar chhuah theihna kawng sialtu pakhat a lo nih ve tawh vang niin an sawi.

Adele hi meizu nasa ve tak mai kha a ni thin a, cigarette leh zu a insum ta a, caffeine lam pawh a thlah ta a, tunah chuan Sirtfood Diet an tih mai zawmin, exercise a la nasa bawk. Adele hian trainer atan Brazilian body wizard an tih mai Camila Goodis a hmang a ni.

Adele hian tunhnai lawk khan Los Angeles-a a in pathumna a lei thar leh a, dollar maktaduai 10 chuang man a ni. Mahse, Adele hian a chawrchhuahna erawh a la theihnghilh chuang lo, Euro 2020 final-ah pawh khan England kawr hain a lo tang ve hle a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy