Advertisement tel loa
NHM-a hna lak sut leh
Health & Family Welfare Department National Health Mission (NHM) hnuaia hna hrang hrang pasarih advertisement tel loa lak a nih avanga Mizo Zirlai Pawl-in sut leh tura a ngenna chu sawrkar chuan tihlawhtlingin a sut.
MZP Gen. Hqrs thuchhuak chuan, NHM hnuaia hna pasarih lakah advertisement chhuah a nih loh bakah DP&AR(ARW) OM- Guidelines tlawhchhan loa lak a nih avangin cancel turin sawrkar a ngen a. A ngen angin June 9 khan heng hna lak hi sutna order hi tihchhuah a ni tih a sawi.
‘MZP ngenna ngaipawimawha Health department-in hna lak tawh an sut leh hi lawmawm kan ti a. Health minister pawhin MZP duhdan anga sut a nih tur thu a sawi hi a puitlin thlak hlein kan a hria a, lawmthu kan hrilh a ni,’ a ti.
Mizoram sawrkar hnuaia hna lak chu dik takin kalpui ni thin se a duh tih MZP hian a sawi a. Advertisement tel loa duh duh inthun theihna remchang chu tun hnuah khawi department-ah mah thleng tawh lo se, tiin, thalai hna zawng mekte tihnual thei zawnga dik lo taka hna lak a awm tawh lohnan MZP chuan hma a la zel dawn tih a sawi a ni.
NHM hnuaia post 7, laboratory technician 3, staff nurse 2, assistant data manager 1 leh executive assistant 1 hi advertisement tel loa lak nia hria in MZP chuan June 10 ralhmaa cancel turin sawrkar a lo a ngen tawh a ni.
Advertisement tel loa NHM-a hna lak sut leh
