Assam Rifles chhuahsan ram hman zui dan tur ngaihtuahtu atana sawrkarin a din Advisory Committee-in a rel thluk tawh china hmasawnna hna thawhna tur duan tawh chu a remchan dan anga bawhzui tan tum a ni.Advisory Committee hi an chairman chief minister Lalduhoma kaihhruaiin Thawhlehni khan a tum 4-na atan an thukhawm a. Tun hnuah chuan AR ram chhuahsan hmunhma leh building hman dilna lam chi chu Committee-ah chhawpchhuah tawh rih loh nise an ti a. An thu lo tihtluk tawh anga hmasawnna hnathawh tur chu a remchan danin sawrkarin thawk zui tawh se an tih bakah a hmunhma tihhmasawn hna (execution of site plan) nodal department atan UD&PA ruat a ni.
Thutkhawm hmasa lama an rel, AR ram chhuahsana mimal leh pawl, pass nei chu an pass neih sawrkara hlan (surrender) tura ngen nise, an tih anga mimal leh pawl hnena ngenna an siam chu thenkhat chuan an ram hi sawrkarah an hlanlet tawh a. Assam Rifles biak in hmun chu YMA writ petition chhung ami nia sawi a nih avangin Committee hian court thu hi tun thlengin a la ngaichang tih a sawi a ni.
Canteen Kuala Hari Mandir humhalh leh hman zui theiha dah tura Mizoram Gorkha Sanchalan Samiti Bazar Branch-in Prime minister hnena lehkha an lo thehluh tawh chu, hnukkir tura ngen turin Advisory Committee chuan thutkhawm hmasa lamah NGO Coordination Committee a ruat a. Tun thutkhawmah NGOCC hian hma an lakna an report a. Rah tha a chhuah ngei an beisei tih an sawi.
Chief minister chuan Advisory Committee hi mipui huapzo Committee a nih avangin, an thutlukna chu mipui huapzo thutluknaah an ngai a. Committee-ah chuan a tam zawk duh dana kal thin an nih angin an thurel chu an zavaia kutthlakna a ni tih a sawi. Committee hian Advisory Committee on AR Land kalphung mipui hnena sawifiahna thuchhuah siam nise, an ti bawk.
Advisory Committee rel tawh chin AR ram chhuahsan khawih tan tum
