Daily Newspaper

Afghan sorkar leh Taliban ten inbiakna nei tan ta

32

Afghan sorkar leh Taliban tena inremna awm theih nana inbiakna an neih hmasak ber chu tan a ni ta.

US Secretary of State Mike Pompeo chuan he inbiakna Doha pan chilh ve nghalin ‘chhinchhiahtlak’ tiin a sawi.

Inbiakna hi US-Taliban security deal kumin February-a siam a nih hnuah tan tura ngaih a nih laiin lung In tang inthleng chungchang leh Afghanistan a tharum thawhna thlen chhunzawm reng vangin inremna a awm thei lo zui ta a ni.

Afghan aiawhte chuan Zirtawpni kalta khan Kabul atangin Doha an pan tawh a, kum 19 kaltaa US kaihhruaia Taliban rorelna paihthlak a nih hnuah inbiakna hi neih tan a ni ta a ni.

Afghan aiawh Abdullah Abdullah chuan ‘inremna tha leh zahawm’ siam ngei an tum thu a sawi a.

Ningani kalta khan Taliban te pawhin lung In tang paruk te Afghan sorkarin a chhuah hnuah inremna atana inbiaknaah an tel tur thu an tichiang ta bawk a ni.

Tun hi Taliban leh Afghan sorkar aiawh tena hmaichhana inbiakna an neih hmasak ber a ni a. A hma zawng chuan Taliban te hian Afghan sorkar chu engmah ni lo leh American ‘uite’ tia sawiin inbiakna an neihpui duh ngai lo a ni.

Inbiakna hi kumin March thlaa neih tan zawk tura ruahman a ni a, mahse, lung In tang inthleng chungchang bakah Afghanistan a Taliban tena tharum thawhna an kalpui chhunzawm avangin neih theihin a awm lo zawk a ni.

US leh Taliban te chuan inremna lo siam tawhin US chuan Afghanistan atanga a sipai te a tahtawlin a la chhuak ang a, Taliban te pawhin US lakah tharum thawhna an kalpui lo zui bawk ang tih a ni.

US leh Taliban tena inremna an siam nan hian kumkhat chuang hman a ni a, Afghan sorkar leh Taliban te inbiakna phei hi chu la khirhkhan zawk tura ngaih a ni. Mi tam tak chuan inbiaknaah hian remna siam duhin Women’s rights te ang chu ngaihthah a nih zui an hlau hle thung.

Taliban te erawh an nem ta tial tiala ngaihna a awm thung a, chutihrualin an tan hmun hriatfiah har tak niin Afghanistan chu ‘Islamic’ ram ni tura an duh rualin sorkar ‘huapzo’ an duh tel tho bawk thu an sawi a ni.

He inbiaknaah hian Taliban tena kum 1990 chhova Sharia law khauh tak an kalpui ang kha kalpui an la ngiat zel dawn em a fiah tura ngaih a ni bawk.

February a inremna kha?
US leh Nato allies te chuan thla 14 chhungin Afghanistan atanga an sipai lakchhuah vek an intiam a. Taliban te chuan an thununna chin ramah al-Qaeda emaw extremist group dang ten behchhana hmanga chet an lak a remti lo thung ang.

US chuan Taliban leh an hnathawh tinah hrekna a kalpui hlih a rem ti bawk a, UN pawhin Taliban te a hrekna a hlip bawkin, US chuan Afghanistan sipai a dah 12,000 atangin 8,600 ah a tihniam nghal ang a, an inbunna hmun tam tak an rauhsan bawk ang.

Afghanistan-ah hian US sipaite kum sawm hnih chuang an awm tawh a, kum 2001-a al-Qaeda in New York an beih hnuah al-Qaeda leader Osama Bin Laden chu Taliban ten an hum tlata US hnena an pek duh loh avangin a runzui ta a ni.

Kumin February inremna siamah Afghanistan sorkar a tel ve lo thung. He mi hnu hian Afghan sorkar leh Taliban aiawhte chuan lung In tang inthleng tawnah inremna nei thei lovin, tharum thawhna a hluar zui ta zel a ni.

Taliban te chuan an commander turu ber ber Afghan sorkarin a man te chu chhuah turin an ngiat a. Mahse, Afghan sorkar chuan, “Kan mite thattu te kan chhuah zalen ngawt thei lo,” an ti bur bawk si a ni.

Mahse, Afghanistan sorkar chuan August thla khan Taliban lung In tang 400 chuang a chhuah ta a, hei hi grand assembly or loya jirga of elders te hmalakna vang a ni. Mi 400 te hi a ruala chhuah vek an ni lo va, France leh Australia te chuan lung In tang an ram mi leh sa leh humanitarian workers te chhuah zalen hi an duh loh thu an sawi vang a ni a. Mahse, Doha a inbiakna neih hmaa heng Lung In tang chhuah a nih tak avang hian Taliban te chuan inbiakna neih an remti ta a ni.

United States of America-in Afghanistan a Taliban te nuai chimit tura chetlakna a neiha indona a puan – Operation Enduring Freedom a hnua Operation Freedom’s Sentinel te hi US history a indona kalpui rei ber a ni a, Vietnam war a kalpui ai pawhin a awh rei zawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy