Daily Newspaper

Afghanistan-ah Taliban ten hmasawn chak hle

9

Afghanistan chhim leh khawthlang lama khawpui lian deuh deuh pathum chehhvelah inkahna nasa tak thleng mekin Taliban te chuan sorkar sipaite nawrchhuah tumin beihpui an thlak.

Taliban fighter te hian Herat, Lashkar Gah leh Kandahar hmun thenkhat an thuhnuaiah an dah tawh a.

Thingtlang hmun lamah te phei chuan ram zau tak an thuhnuaiah an dah sa tawh bawk.

Heng khawpui pathum an beih mek te hi khawpui pawimawh tak niin sorkar sipaite tanrei theih dan tur hriatthiam a har hle nia sawi a ni.

Fundamentalist Islamist militia te hian Afghanistan ram zahve an thuhnuaiah an dah tawh nia sawi niin Iran leh Pakistan ramri te phei chu an thuhnuaiah a awm sa tawh a ni.

Inrinni kha Lashkar Gah khawpui chu an thuhnuaiah dah hman tepin governor office bul lawk an thleng hman a, mahse, sorkar sipai ten an nawr kir leh thei hlauh nia sawi a ni a.

Lashkar Gah hi Helmand province khawpui niin US leh British sipai thahnem tak te nunna channa hmun niin Taliban te thuhnuaia awm thei renga ngaih a ni a. A mi chengte pawh Taliban thlawp tam zawk nia ngaih an ni bawk.

Kandahar khawpui pawh Taliban te kuta tlu mai thei dinhmuna ding nia sawi niin inbeihna avang hian mi sang tam tak chu chenna nei lova siamin an awm tawh bawk a.

Kandahar MP Gul Ahmad Kamin chuan darkar tinin dinhmun a chhiat tial tial thu sawiin kum 20 chhunga Kandahar khawpuia inbeihna nasa ber a thlen mek thu a sawi bawk.

Taliban te hian Kandaha thi lak ngeia an temporary capital a hman an tum nia ngaih a ni a. Kanadahar hi an la a nih chuan province dang paruk an thuhnuaiah an dah zui thei mai dawn niin Kamin chuan a sawi bawk.

Taliban sipaite hi khawpui chhung hmun hrang hrangah an inzar pharh tawh a, civilian te an tam bawk si avangin sorkarin ralthuam lian a hmang thei dawn lo nia sawi a ni bawk.

Herat-ah pawh inbeihna nasa tial tialin Tolo News reporter chuan Taliban te chuan chhim lam atangin khawpui an lut tan tawh niin a sawi a, Herat hi sumdawnna hmunpui pawimawh tak a ni.

Afghanistan-a EU special envoy Tomas Noiklasson chuan Taliban te chuan tun hma an tih thin dan ang bawkin Islamic emirate din an tum tiin a sawi a.

British Armed Forces hotu hlui Gen David Richards pawhin ram dang sipai ten Afghanistan an chhuahsan hnuah Afghan army te moral a chhiat thu sawiin hun rei lo te chhungin Taliabn tena an thunun mai a rin thu a sawi bawk.

US sipai leh Nato alliance te chuan November 2001 khan Taliban te an paihthla a. 11 September 2001 a US beitu Osama Bin Laden an hum avanga beih tawk an ni.

Khawvel ram ten Afghan tundin leh tuma dollar billion tel senga Afghan sipai te training pea hma an la chungin Taliban te chuan chak lam an pan tial tial tho.

February 2020 khan khatihlaia US President Trump chuan sipaite an lakchhuah tawh tur thu a sawi a. Kuminah President Joe Biden chuan September thlaah US sipaite chu lakchhuah vek an nih tur thu a lo puang chiang zui tawh bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy