Afghanistan-in India-ah mamawh a dap belh zel

Afghanistan-in India-ah mamawh a dap belh zel
Afghanistan-a Taliban trade minister chuan a vawi khat nana tlawh turin Nilaini khan India a thleng a, an thenawm, Pakistan nena an inkar a chhiat zual mek karah investment leh bungrua inthawnah Delhi chu thlun zawm a tum.
India hian thla hmasa khan Taliban nena an inkar titha tharin kum 2021-a Islamist pawlin thuneihna an chan hnua a khar, Kabul-a a embassy chu a hawng thar leh a. New Delhi hian China elin puihna pawh a thawn tam sawt hle bawk.
Minister Alhaj Nooruddin Azizi-a hian a cham chhungin Indian trade minister leh foreign minister a kawm dawn bakah sumdawng leh investor-te pawh a kawm dawn niin an ram commerce ministry chuan thu a chhuah.
“Heng inkawmna hi eibara thawhhona, insumdawn tawnna, tangruala investment tih theihd an dapna leh heng lai rama inpawhna thuk zawk a awm theih nana Afghanistan tih ve tur sawihona tur vek a ni,” an ti.
Tuipui atanga pawh theih loh Afghanistan hian thla hmasaa ramria Pakistan nena an inbeih hnua ramri khar a nih hnuah buh, damdawi leh industry-a hman chi bungruate lak luh dan dang dap a ngai hle a ni.
India hian Iranian lawngchawlhna, Chabahar-ah hmun neiin Afghanistan nena inkalpawh theih a ni a, thla hmasa khan US-in a hrekna thla ruk chu hlihsak a ni bawk a, Kabul-in Pakistani lawngchawlhna, Karachi-a a innghah thin a chhawk thei tura ngaih a ni.
Thla ruk liam ta chhung khan Afghanistan-in Iran kaltlanga sum a dawnna hi $ tluklehdingawn 1.6 a tling a, Pakistan nena $ tluklehdingawn 1.1-a an insumdawn tawnna aiin a tam tih Afghan commerce ministry chuan a sawi.
Indian foreign ministry thupuangtu, Randhir Jaiswal-a chuan, “Tun tumah hian insumdawn tawnna leh investment tihna tur thil chu sawiho tur pawimawh ber a ni,” tiin X-ah Azizi-a’n Delhi a thleng lai thlalak nen a dah.
India leh Afghanistan hi tun hmaa inkawmngeih tak an ni a, Taliban hun hmasaah pawh khan an inpawh viau a, tuna sorkar erawh hi chu New Delhi hian a la pawm chuang lo.
Mi thiamte chuan New Delhi leh Taliban inkawmngeih thar ta hi Afghanistan leh Pakistan inkar a chhiat vang bakah India hian China-in Afghanistan-a huhang a neih nat lutuk tur ven nan inrawlh a duh vang niin an ngai.