African Footballer of the Year atan
Osimhen leh Oshoala
Morocco ram khawpui len dan indawta a palina Marrakesh-a Confederation of African Football (Caf) awards ceremony-ah Nigeria player Victor Osimhen chu 2023 African Footballer of the Year (mipa) atan thlan a ni.
Napoli player Osimhen hian award dawng ve tura beiseiawm dang Egypt star Mohamed Salah leh Morocco player Achraf Hakimi a hmakhalh a, kum 1999-a chawimawina dawngtu Nwankwo Kanu hnu lamah Nigerian zinga he title la leh thei hmasaber a ni.
Victor Osimhen hian Napoli kuta Serie A a luh theihna kawnga goal 31 lutah direct-in a inrawlh a; Naples khaw team chu Uefa Champions League quarter-final a thlenpui bawk.
African Footballer of the Year award semah hian Nigeria lamin pahnih an hui a, pakhat zawk chu women’s award niin, hmeichhe African Footballer of the Year ni lai Asisat Oshoala bawkin a vawirukna atan award a dawng leh a, Barcelona forward khing pha African hmeichhe zing-ah an la awm remchang mai lo niin a lang.
Chawimawina dawngtute hi Caf technical committee bakah African media professional rual, head coach leh captain tinte’m vote hmangin an thlangchhuak a; Caf continental competition hrang hranga group stage thleng pha club-te’n aw an nei ve bawk.
2022-23 season-a chetha lawr Napoli striker Osimhen hi tunah kum 24 mi lek la niin, tun hi a career-a Caf award a dawn vawikhatna niin, match 32-ah goal 26 a khung tling a, chu’ng zingah chuan kumin May thlaa Naples khaw team-in Scudetto an lakna goal pawimawh telin, Napoli-in kum 33 hnua a vawikhatna atan Serie A title an lak theihna kawngah a thawhhlawk.
Wolfsburg leh Lille striker hlui hi tunthla tir lam khan Italian Footballers’ Association Player of the Year-ah thlan a lo ni tawh bawk.
Lagos-a piang Osimhen hian Africa Cup of Nations (Afcon) qualification match li a khelh atangin goal nga a thawh bawk a, a ram chu kum thara khelh tur Africa Cup of Nations a tlinpui.
Season liamta khan a chetha bawk a, Nigerian zinga Ballon d’Or top 10 luah thei hmasaber niin, vote hmuh tam lamah pariatna a hauh a; an ramah chuan Member of the Federal Republic a ni nghe nghe.
Hmeichhe chawimawina dawngtu Barcelona star Oshoala pawh hi Nigeria ramah chuan a chungnung fal hle a, Women’s Player of the Year title la ngunber niin, kumin hian Australia leh New Zealand rama khelh World Cup-ah ram tan a inlan bawk.
Kum 29 mi hian award dawng ve thei tura khalh fal dang pahnih South Africa leh Racing Louisville star Thembi Kgatlana bakah Zambia leh Shanghai Sengli player Barbra Banda a hmakhalh.
South African Desiree Ellis chuan a tum lina atan hmeichhe Caf Coach of the Year award dawngin, a tumkhatna atana Banyana Banyana (Nigeria) chu World Cup khel tur a tlinpui vang a ni.
Mipa zinga coach tha ber lawmman chu Morocco boss Walid Regragui chanah a tla a, an ram national men’s team tan hun chhinchhiahtlak a ni.
Atlas Lions tia koh duat hlawh Morocco kha Qatar 2022-ah khawvel mak tih khawpin a rawn chetthatpui a, African team zinga mipa World Cup semi-final thleng hmasaber niin, a hrualna hnuaia chetha Yassine Bounou pawhin Men’s Goalkeeper of the Year prize a dawng ve bawk.
Nigeria women’s national football team (Super Falcons) kutah Women’s National Team of the Year chawimawina lutin, Paris FC star Chiamaka Nnadozie chuan women’s goalkeeper award a dawng.
Mamelodi Sundowns of South Africa chu Women’s Club of the Year atan thlan niin, a vawihnihna atana African Women’s Champions League an dawn vanga he chawimawina hi hui thei an ni.
Egyptian giants Al Ahly chuan kumin hian record siamin a tum 11-na atan Africa khawmualpui club-te inelna sangber Champions League title an lak leh tak avangin Men’s Club of the Year award an dawng chiang hle.
Senegal president Macky Sall kutah special achievement award hlan a ni.
023 Caf award dawngtute
Player of the Year (men)
Victor Osimhen (Napoli & Nigeria)
Player of the Year (women)
Asisat Oshoala (Barcelona & Nigeria)
Coach of the Year (men)
Walid Regragui (Morocco)
Coach of the Year (women)
Desiree Ellis (South Africa)
National Team of the Year (men)
Morocco
National Team of the Year (women)
Nigeria
Goalkeeper of the Year (men)
Yassine Bounou (Al Hilal & Morocco)
Goalkeeper of the Year (women)
Chiamaka Nnadozie (Paris FC & Nigeria)
Young Player of the Year (women)
Nesryne El Chad (Lille & Morocco)
Young Player of the Year (men)
Lamine Camara (Metz & Senegal)
Club of the Year (women)
Mamelodi Sundowns (South Africa)
Club of the Year (men)
Al Ahly (Egypt)
Interclub Player of the Year (women)
Fatima Tagnaout (AS FAR & Morocco)
Interclub Player of the Year (men)
Percy Tau (Al Ahly & South Africa)