Daily Newspaper

Agarbati stick siamna leh puantahtute hman tur hmun hawng

23

Zuangtui Industrial Estate-a Bamboo Processing Factory leh Common Facility Centre chu Zirtawpni khan Commerce & Industries minister Dr R Lalthangliana’n a hawng. Bamboo Processing Factory hi agarbati kuang (stick) siamna tur niin Common Facility Centre hi Zuangtui Industrial estate-a puantahtuten hman tur a ni.

Bamboo Processing Factory hi Bamboo Development Agency-in National Bamboo Mission hnuaiah cheng nuai 60 senga din niin, 2020 September-a sak tan a ni. Round agarbatti stick, size hrang hrang siamchhuahna hmun tur niin, thla khatah round agarbatti stick ton 10.40 siam thei tura duan a ni. Stick siamchhuah hi khawvela agarbatti siamtu company lian ber Ranga Rao & Son, Mysore-in a lei zel dawn a. He company mi leh sate pawhin a hmunah kalchilhin, he unit atanga product awmte an endik vek hnu ah, he unit atanga product awm zawng zawngte tha tawkah ngaiin, lei vek an duh thu an sawi a, an ni hian India bakah Laos, Vietnam leh USA-ah factory an nei a ni.

He unit-ah hian agarbatti siamna khawl 8 dah a ni a. Round agarbatti siamna atanga hnawmhnawk (waste) tlingkhawm hmang tangkai turin, bamboo charcoal & vinegar unit siam tel a ni a, he unit hi ‘zero waste’ ni tura duan niin, round agarbatti stick siamte nget-in a eichhiat loh nan, seasoning chamber pakhat siam a ni bawk.

Bamboo Development Agency-in a din Common Facility Centre hi Zuangtui Industrial Estate-a puan tahtuten an hman tangkai tur a ni a. Directorate of Commerce & Industries-a Handloom Textile & Handicraft Wing-in a enkawl chhunzawm ang.

Puantahtute hian puan ban manah Rs. 1200 te an chawi thin bakah la hlum man pawh an chawi thin a, an mamawh phuhruk nan department hian CFC-ah hian electric hmang la hlumna leh a phei hlumna chi li chu a tlawm thei ang bera an hman turin a dah bawk.

Commerce & Industries minister chuan Mizoram economy chawikang tura kan intodelh ber pakhat chu mau a ni, tiin, sawrkar pawhin a ngaipawimawh hle tih a sawi. “Kan ram mau ngei hmanga eizawnna ngelnghet thalaite tana din a ni thei hi a lawmawm a, kan ramah mau a tha duh a, mau phurhchhuahna tur link road tha kan neih a pawimawh avangin chief minister Pu Zoramthanga’n a vei em em a, sawrkar laipui lamah a bawhzui mek a ni,” a ti.

Sawrkarin Sakawrtuichhuna Industrial Growth Centre a din chu a nihna tur ang taka hman tangkai a nih theih nan ruahmanna siam a ngai tih a sawi a. A tak ram chantir thei lo leh a nihna ang taka kalpui thei lo hmunhma nei an tam tih sawiin, a ramri chin pawh pawnlam atanga nasa taka nek a ni tih Dr R Lalthangliana hian a sawi.

“Sawrkar laipui leh state pawn atang pawha en tlak leh tlawh tlak ni tura hmun hrang hranga kan hmunhmate hi cheibawl a tul a, hemi atan hian master plan fel leh mumal tak kan siam a tul. Project siam dawnin, rotling tur bakah mipuiten a hlawkna an tel ngei theih turin engkim ngaihtuah fel vek thin a pawimawh a, hluihlawn mai mai tur leh mipui leh sawrkar tana phurrit ni tur project hi chu ngaihtuah loh a tul a ni,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy