Agriculture & Farmers’ Welfare department tia thlak a ni dawn

t chu Agriculture & Farmers’ Welfare Department tia thlak tum a ni tih Agriculture minister PC Vanlalruata chuan a sawi.
Thawhtannia Thingdawl Agriculture Farm, KVK Kolasib hmun leh District Agriculture Office Kolasib a tlawhnaah Agriculture minister chuan kuthnathawktute hlawhtlinna leh dinchhuahna atan sawrkarin theihtawpin hma a la dawn tih a sawi a. Kuthnathawktute hamthatna chu sawrkarin a ngaihpawimawh ber pakhat a nih avangin Agriculture department hming pawh Agriculture & Farmers’ Welfare Department tia thlak tuma hma lak mek a ni tih a sawi.
Kuthnathawktuten an thil tharchhuah hralhna (market) tha tak a awm sa tih hriaa ngaihngam taka hma an lak theih nan market ngaihtuah sak an ni dawn tih a sawi a. Kum tharah market engemawzat puan belh tum a ni, tiin, thil thar lei tur zingah buh lei tel tuma hma lak a nih tur thu leh ram neih chungchangah inkhuahkhirhna fel zawk a awm theih nan Mizorama leilet leh huan ram neitu zawng zawng khawl hmanga chhinchhiah (digitalise) tum a ni tih a sawi bawk.
Minister hian Thingdawl Agriculture Farm-a hna thawh mek, NABARD RIDF sum nuai 150 hmanga Seed Processing & Seed Storage Unit sak mek leh nuai 258.89 senga Solar Powered Cold Storage for Potato Seed sak mek a enfiah a. Heng hna pahnihah hian civil work thawh zawh tawh niin, a pumin zaa 50 vel zo tawh anga ngaih a ni. A khawl bun tur leh a cheibawlna tur hmabak a la awm.