New Delhi-a Global India AI Impact Summit 2026 neih mek karah a tlawhtu ram hruaitute chu Prime Minister Narendra Modi-a’n a kawm a, thawhhona awm thei leh thil hrang hrang a sawipui hlawm.
Modi-a hian Estonian President Alar Karis chu tun hnaia tihfel, India-EU Free Trade Agreement (FTA) leh nakin zel atana technology-a thawhho theihna awm thei a sawipui.
X-ah, “Technology leh AI-a hriat hlawh tak, Estonia President Alar Karis nen tha takin kan inkawm a. EU FTA thlir chungin eibara kan thawhho theih dan turte kan sawi dun a. Technology, energy hman dan, thiam thil leh thil danga kan thawhho theih dan turte pawh zau takin kan sawi dun,” tiin prime minister hian a tar lang.
Prime Minister Modi-a hian Bhutan Prime Minister Tshering Tobgay pawh hmasawnna daih rei thlenna tura AI hman theih dan tur leh India-Bhutan inthian thatna tihnghet lehzual dan tur a sawipui.
“Prime Minister Tshering Tobgay-a nen kan inkawm chu kan hlawk hle a. Khawvel tha zawk leh daih rei zawk hmasawnna a awm theih nana AI tangkai theih dan tur kan sawi dun a. India-Bhutan inthian thatna, inrinna, induhsakna leh kan ram mite inpawhna thuk tak awmte chu chhunzawm zel theih dan tur leh a tha zawnga her dan turte pawh kan sawi a ni,” tiin X-ah a tar lang.
Summit karah hian prime minister hian Kazakhstan Prime Minister Olzhas Bektenov-a pawh a kawm a. X-ah, “Prime Minister Olzhas Bektenov-a nen vawiin khan kan inkawm a, a lo zin hian India-Kazakhstan Strategic Partnership a tinghet zual dawn a. Sumdawnna, energy, leilung hausakna vâng chu, ram venhimna, inpawhna leh vanthengreng thlenga kan thawhhona tur kan sawi a; inthian thatna siam that zel kan tum bawk,” tiin a tar lang.
Croatian Prime Minister Andrej Plenkovic-a technology, thil thar chin chhuahna, lawng sak leh thil dang danga thawhhona an sawi dun bawk.
“Croatian Prime Minister Pu Andrej Plenkovic-a nen hlawk takin kan inkawm a. A mi mal taka India-EU FTA tha a tihziate min hrilh a, Europe-ah India hi beisei phak bakin a lian dawn a ni,” a ti.
Modi-a leh Serbian President Aleksandar Vucic nen ram venhimna, thil siam chhuah, digital public infrastructure leh kawng danga inkungkaihna nghet an neih theihna tur an sawi dun bawk.
“India AI Impact Summit karah President Aleksandar Vucic-a nen kan inkawm a. Venhimna, thil siam chhuah, DPI, lei tihthatna leh thil danga thawhhona kan sawi a. Kum tam tak chhung India leh Serbia hi kan inpawh tawh a, hun lo kal zelah pawh kan inpawhna hi a ngheh lehzual ka ring tlat a ni,” a ti.
Modi-a hian technology-a khawvela hruaitute pawh a hmu a, Google CEO Sundar Pichai-a nen India-a AI hma a lakna leh zirlaite nena an thawhho theihna remchang awm theihte an sawi dun.
“Delhi-a India AI Impact Summit-ah Pu Sundar Pichai-a ka kawm thei hi ka lawm hle a ni,” tiin Indian zirlai vengva leh theihna neih tha tak takten an hnuaia hna an thawh theih dan turte a sawipui tih X-ah a tar lang.
Prime minister hian Finnish Prime Minister Petteri Orpo pawh technology-a thawhho zel theih dan tur a sawipui a. “Finnish Prime Minister Pu Petteri Orpo-a nen kan inkawm a, India-Europe inkara hun rangkachak thlen thei tur, India-EU FTA a thlawpna avangin lawm thu ka hrilh a. India leh Finland hian kan inkara sumdawnnaah a leta tihlen kan tum a, eibara inpawh zawk kan duh a ni,” tiin X-ah a tar lang.
Summit karah hian Modi-a hian Spanish President Pedro Sanchez-a pawh ram venhimna, himna leh technology-a India-Spain inkungkaihna tihhmasawn dan tur a sawipui.
“Kan ram chuan kum 2026 hi India-Spain Year of Culture, Tourism & AI kan ti a, hei hi kan mite an inpawhna tur a ni a,” a ti a. Spain-a university lian tak tak aiawhten India an tlawh pawh a lawm thu a hrilh.
India AI Impact Summit 2026 hi Bharat Mandapam, New Delhi-ah Thawhtanni atanga tan kha niin Zirtawpni thleng a awh dawn a ni.
AI Summit karah PM-in ram dang hruaitute kawm
