Aikal la an la awm cheu hi…

ZPM-in sawrkarna an chelh hnuah aikal lak tihtawp tuma hma lak nghal niin, an sawrkar hlim kum khat pawh a ral hmain department hrang hrang hnuaia aikal la 3,365 zet hmuhchhuah nghal a ni a. Aikal laten harsatna hrang hrang an neih dan hriat a nih hnuah special retirement scheme te siam a ni. Hun a lo kal zel a, kum hnih chuang a han ral leh meuh chuan, aikal la engemawzat an lo la awm reng mai tih hmuhchhuah a ni leh ta a.
Nimin assembly session-ah Pu Lalchhuanthanga zawhna chhangin DP&AR changtu Pu K. Sapdanga minister chuan tourism department hnuaia aikal thawktu mi 18 chawlhtir an nih thu te, higher & technical eduaction dept hnuaiah hremna tenau pek mi 8 an awm thu te, power & electricity department hnuaiah mi 7, school education dept hnuaiah mi 2, GAD hnuaiah mi pakhat, health and family welfare hnuaiah mi pakhat, an vaiin chawlhtir mi 29 leh hremna tenau mi 8 lakah action lak a nih tawh thu a sawi a. Hei bakah hian Samagra Siksha hnuaiah aikal la mi 9 hmuhchhuah thar a nih thu leh, a concern official-te kova insawifiahna hun pek an nih hnuah action lak a nih tur thute pawh a sawi nghal a.
Thil mak angreng tak chu, sawrkarin aikal lak tihtawp tuma thawm ring tak chhuah chunga hma a lak mek lai hian, a ruka aikal la hetiang zat (37) zet mai tun hnua hmuhchhuah tur an la awm cheu thei hi a ni. Hetih mek lai pawh hian, aikal la an awm leh awm loh hi uluk takin combing search neih ni ta se, khuih chhuah tur hi an la awm cheu maithei e.
Heta tanga lo lang chiang ta chu, tuna aikal la awmna department theuha a concern official (head of dept/controling officer) te hian tun thlengin aikal lak an lo la zep ru tang tang ngam a, sawrkar thupek an zah lovin an zawm lo a, an zawm lo ngam hi, a mak hle tih hi a ni.
Thil pakhat chu, aikal late hian anmahni thuin, an duh dan danin aikal hi la-in an aiawhin an thawhtir thei mai lo va, an hotute hriatpuina leh phalna an lak ngei ngei a ngai, tih hi a ni. Sawrkarin aikal la mi 3,365 zet an hai chhuah khan, heti zat aikal lak lo remtihpuitu official-te chungah khan eng action nge lak a nih ve tak? Hmalakna thar a nih avangin ngaihhnathiamna lo awm ta pawh ni se, a hnu lama aikal lak la zep rengtu controlling officer-te chungah hian eng action nge lak a nih ve dawn? tih te hi zawhna awm thei a ni awm e.