Air ambulance tlaah a chuang pasarih thi vek

Air ambulance tlaah a chuang pasarih thi vek
Jharkhand-a Chatra district-ah Ranchi aṭanga New Delhi pan tur air ambulance chu Thawhtanni zan khan a tla a, a chuang mi pasarih an thi vek nia hriat a ni.
Chetsualna hmun hi ramngaw thuk tak a nih avangin thi zat hi finfiah theih a ni lo tih Chatra Deputy Commissioner Keerthishree G chuan PTI a hrilh a, an thih vek erawh a rinawm tih a sawi.
He thlawhtheihna hi Delhi-a Redbird Airways-in a enkawl? Beechcraft C90 a ni a, Ranchi-a Birsa Munda Airport aṭangin zan dar 07:11-a thlawk chhuak niin aviation regulator DGCA thuchhuah chuan a tarlang.
Kolkata nena inbiakpawh hnuah zan dar 07:34-ah VT-AJV hian chuan Kolkata nen inbiakpawhna leh radar atangin hloh a ni a, chu mi hnu rei vak lovah chuan thlawhna chu Simaria bula ramngaw-ah a tla ta a ni.
Akshay Yadav ta, Redbird Airways hi kum 2018 khan din a ni a, kum 2019 khan non-scheduled flight service phalna a dawng niin an website-in a tarlang a. Thlawhna paruk a nei.
He thlawhna tla leh hian miin an hman chi thlawhna enkawltute leh anmahni enkawlna dan zawm a ni em tih zawhna a pian nasat phah hle a. January 28-a Baramati-a Learjet 45 thlawhtheihna chesuala Maharashtra deputy chief minister Ajit Pawar leh midang pali thihna pawh a hrana chhui chian a phut ni a, chief minister Devendra Fadnavis chu Pathianni khan CBI chhui chianna tura tih a duh thu a sawi.
DGCA hian a hmain non-scheduled operator zawng zawngte special audit an neih thu a lo sawi tawh a, mahse report hi vantlang hriatah puan chhuah a la ni lo. Learjet tla khalhtu, VSR Ventures chungchanga an chhui chianna report pawh a tichhuak lo.
Hei hi June thla hnua civil aviation-a thihna thlen vawi thumna a ni bawk a, Air India Boeing Dreamliner chu Ahmedabad airport aṭanga a thlawh chhuah hnu lawkah a tla a. He thlawhna tlak chungchanga report hnuhnung ber pawh tihchhuah a la ni lo.
Tun tum thlawhna tlaa chuang zingah hian kum 41 mi damlo, Sanjay Kumar, a taksaah kangmei hliam 63% tuar, Ranchi-a Devkamal Hospital and Research Centre atanga sawn mek; Dr Vikas Kumar Gupta, paramedic Sachin Kumar Mishra, attendant pahnih Archana Devi leh Dhuru Kumar, leh crew member pahnih Vivek Vikas Bhagat leh Savrajdeep Singh, captain pahnih te an tel.
Khua a chhe lutuk hi thlawhna tlak chhan a ni thei a, a chhan tak erawh chu chhui chian a nih hnuah chauh hriat theih a ni ang, tiin Ranchi airport director Vinod Kumar chuan a sawi.
Devkamal Hospital CEO Anant Sinha chuan PTI a hrilh danin air ambulance hi an damlo pakhat tana ruahman a ni a, hei hi an chhungten Delhi-a hruai an tum vang a. “Damlo hi tlai dar 4.30 vel khan damdawi in atangin Delhi lam panin a chhuak a ni,” a ti.