Sawrkarin Lengpui Airport cheithat hna a kalpui mekah siamthat ngai nia report ho chu siamtha tura a mawhphurtuten an bawhzui tha lo a nih chuan an party-in hma an lak a ngai dawn tih BJP Mizoram thupuangtu Lalremsangi Fanai chuan a sawi.
Zirtawpnia an State office-a political session-ah BJP State spokesperson hian, Mizoram State Monitoring Committee-in Lengpui Airport cheithat hna thawh a endiknaah he Committee member a nih anga a tel ve avangin report a pe a. Airport cheithat hna thawh mekah mipui tana him tawk lo a awmin an hria a, chu’ngte chu thuneitu ah hriattir a ni tih sawiin, “Sawrkarin hma a la ngei turah ngai ila, an siamtha lo a nih phei chuan party anga hma kan lak chhunzawm a ngai dawn a ni,” a ti.
BJP MLA Dr K Beichhua chuan MP inthlana an party candidate, an party State president ni bawk chu a fakawm a, political party dang candidate-te tan pawh entawntlak tak nia a hri thu a sawi. Party dang candidate-te bei lo leh, party dangte diklo taka beihna a chhakchhuak lo chu a puitlin zia a langchiang hle, tiin, “BJP manifesto hmangin mipui vote a zawng mai a, hei hi a Kristian hle in ka hria. Pu Vanlalhmuaka atang hian political party dang pawhin zir tur kan ngah a, policy base-a politics kan khelh a, mipui tana hamthatna leh thlan tur dik an neihna tura hma kan lak thin a pawimawh a ni,” a ti.
Union Finance minister-in Siaha a tlawh tuma an titi naah, central scheme hrang hrang a dawng tur dik takten an dawn theihnan dik taka hma la tur leh report kimchang tak siam a, chutianga thil nihna dik tak hmanga a dawng tur tak ten an dawn theih nan BJP Mizoram-in hma a lak a ngai tih a chah niin Siaha bialtu MLA Dr K Beichhua hian a sawi.
“Theihtawp chhuaha hma kan lak a ngai dawn a, thil dik lo awm thei ang zawn chhuah a, mipui tana politics dik chhawpchhuaktu kan nih theih nan hma latu leh midang tih hmuhtu kan ni ngei dawn a ni,” a ti.
Airport cheithatnaa siamthat ngai an bawhzui loh chuan hma kan la ang – BJP thupuangtu
