Airport hralh tuma puhtuten
airport enkawl loh dan dap
MNF sawrkarin midang kuta airport hlan tuma a dawr lai vela mipui thluak suk tuma airport hralh tum thu aupuituten an sawrkar hnu ah airport enkawl loh dan an dap ve leh tih BJP Mizoram president Vanlalhmuaka chuan a sawi a. Mizorama politician-ten eng politic nge an khelh tih hetah chauh pawh hian a chiang tih a sawi.
BJP Mizoram hian Zirtawpni khan an office-ah hun hmangin State president chuan, Lengpui Airport chu MNF sawrkar lai khan AAI nen indawrin, a tu ve ve tan pawha insiamrem ngai tam tak ngaihtuah tur a awm a, nimahse tuna sawrkar mek party hian MNF-in airport hralh an tum, tiin Mizo thalai leh mipui thluak an suk sak a, MNF sawrkar khan hma an la zui thei ta lo niin a lang, tiin a sawi.
“Vawiinah erawh Lengpui Airport hralh tuma puhtute hian Lengpui Airport enkawl loh dan an dap ve leh a ngai ta tho niin a lang a; heng thil kan hmuh atang hian Mizorama politician-te hian eng politics nge kan khelh a, tute nge kan khelh, tih a chiang hlein a lang. BJP chuan thil thaah chuan tu pawh sawrkar se, party politics tel loin Mizoram tana tha turah chuan kan thlawp zel dawn a, chutiang rilru pu tur chuan political party dang pawh kan chah a ni,” a ti.
Local council leh village council inthlanpui neih turah BJP Mizoram chuan mipuiin khawtlang tana malsawmna kan dawnna kailawn tur a nih avang leh central scheme tam tak local level hruaituten kalpui a ngaihna chin a awm avangin a tam thei ang ber chuh turin hma an la dawn tih Vanlalhmuaka hian a sawi.
“Inthlanah Mizorama sawrkarna chelh mekte tan fiahna hun a nih theihna a awm a, mipuiin party politics kan ruihchilh thin avangin vote kan thlak pawh hian kan vote chhan kan hre tam lo hle. Political party-ten inthlan hmaa thu min tiamte kan chhut nawn tawh ngai loa, hei vang hian ram pum huap anga hmasawn a har phah a ni. LC/VC inthlanah pawh rilru fim tak nen kan khawtlang hmasawnna a thlen theihnan ngaihtuahna seng theuh turin mipui kan sawm a ni,” a ti.
Airport hralh tuma puhtuten airport enkawl loh dan dap
