Aizawl Bazarpuia dawr nei nu pakhat chu an dawr bula an kudam-ah thia hmuh a ni a, kut tuar ni ngeia ngaih nghal niin, a mawhphurtu nia hriat pawh police-in man nghalin boruak duh awm lo thleng palh theiah Central Jail-a dah a ni.
Thudawn danin, Aizawl Bazarpuia dawr nei V Lalhmingthangi (52) w/o C Zothanmawia, Tuikual South chu Inrinni – March 16 khan tlai lama dawr khar hnu ah a haw loa, a haw lo tih hi hriat a ni mai loa, Pathianni zing lamah hriat chauh a ni. Nidangah pawh dawr bungrua chingfela tlai chang a neih fo avangin a pasal pawhin a lo mutsan mai chang a awm nia sawi a ni.
Pathianni zing hian inah a haw loh avang leh a phone-a biak tlang theih a nih loh avangin Bazarpuia an dawr hi a chhungten an va enfiah a, thia hmuh a ni.
Hemi chungchang hi Home minister K Sapdanga chuan thuthar thudarhtute a hrilhfiah a. Aizawl Police Station-ah a pasal Zothanmawia hian a nupui a haw loh avanga pui tura ngen a tum mek laiin, a ruang hmuh a nih thu hi hriat chawpchilh a ni a, police leh forensic team kal nghalin hnu an chhui zui ta tih a sawi.
A hmuna thil awmdan leh he thil thleng chhungchanga thu hriat nei awm angte statement atangin police team hrang hrang insem darh chuan a titu ni ngeia rinhlelh Irene Lallawmzuali (34) w/o Lallungmuana, Ramthar North-a cheng chu Zemabawk Dinthar Venga a thiannu in atangin Pathianni khan lak niin, case ziahluh a ni.
“Kan mi rinhlelh kut atang hian tualthahna atana hman ni ngeia lang chemte leh tualthi ta thil neih ni ngeia lang engemawzat man tel a ni a. Kan mi rinhlelhin police hmaa a thusawi atang chuan ama tih ngei niin a lang,” Home minister hian a ti.
Nunna chan V Lalhmingthangi ruang hi postmortem a ni a, hnu chhui tur tam tak la awmte chu a tahtawla uluk taka chhui zui tur a ni, tiin, thil tisualtu in thiamloh a chan ngei theih nan mipuiin theihtawpa police-te hnuchuina pui turin a sawm tih a sawi a, hnuchhui ti thuanawp thei tur thil ti lo turin an inngen tih a sawi bawk.
Zawhna a chhannaah Home minister chuan, pawikhawihtu nia hriat hi dawr bungrua semkual thin a ni a, thurualpui a neih leh neih loh bakah thildang chu chhui mek a ni, a ti a. Hun reilote chhunga police-in hetianga hma an la nghal chu a lawmawm a, thil thleng erawh vanduaithlak a tiin pawi a tih thu a sawi a ni.
AIZAWL BAZARAH INTHAHNA A thattua puh man nghal
