Aizawl Municipal Corporation buatsaiha Aizawl Day vawi 133-na lawm chu Inrinni khan khar a ni.
A lawmna pui ber Aizawl Sipai Lammuala buatsaih hmanpuitu Aizawl mayor Lalrinenga Sailo chuan kum 1890 February 25 atang khan mei mit loin Aizawl luah tan a ni a, he ni hi Aizawl khawpui din tan ni ah chhiar a ni, tih a sawi.
“Aizawl mipuiin nasa takin hna kan thawk a, a te ber atanga a lian ber thlengin he ni pual hian hun hlimawm tak hman kan phu nia kan hriat avangin AMC chuan Aizawl Day hi ropui taka hman nise, tiin a rel a ni,” mayor hian a ti a. Kum 133 chhung hian Aizawlin hun hlimawm tak tak leh hun khirhkhan tak tak a lo paltlang tawh thu te, mi ram ang bawkin Aizawl hian history tam tak a neih thu te sawiin, “Aizawl Municipal Council din tan atangin vawiin thlengin Aizawl khawpui hmasawnna turin AMC chuan hma a la a, kawng hrang hrangah hmasawnna a hmu chho zel a ni,” a ti.
Sawrkarin ruahmanna hrang hrang a siamte, dan a duante, in leh lo sak dan, khawpui enkawl danahte sawrkar dan zawm hram hram turin a sawm a. Kum lo la kal zel turah pawh ‘Zofate Jerusalem’ Aizawl khawpuiah Aizawl Day hmannaa tel turin ram chhung leh pawna awm Zofate a sawm tih a sawi bawk.
Kumtinin Aizawl Day hi February 25 apianga lawm tura ruahman a ni a. A lawmna buatsaih hmasak berah hian kumin February 22 atang khan Film Festival, thiam thil hrang hrang pholanna exhibition, cosplay, naupang infiamna hmun, band intihsiak, football tournament, costume parade leh photo exhibition te buatsaih niin, food stall siam a ni bawk.
Mizo thalai, mahni kea din tum, sumdawnna bul tan tir leh engemawchen hma la tawh thahnem takin stall an luah bakah bank lam thlengin mipui tan dawr theih an ni a, Apex Bank-in ATM a chhawp a ni.
Aizawl Day vawi 133-na lawm zo
