Aizawl Municipal Corporation chuan February 21-24, 2024 chhung hian Aizawl Day Celebration vawi hnihna a huaihawt dawn.
Aizawl day lawm dan tur chungchangah hi nimin khan AMC Mayor Lalrinenga Sailo chuan thuthar thehdarhtute sawipuiin Aizawl Day chu Aizawl mipuite tana AMC luanchhuah vena a ni a, programme hrang hrangte tihlawhtling tur leh a neitu nihna rilru pua Aizawl Day lawmnaa tel vek turin Aizawl mipuite thinlung takin an sawm tih a sawi.
Aizawl Day hi Walkathon te, Faina Hnatlangpui te, Mayor’s Cup Volleyball Competion te, Exhibition cum Stall te, Main Events-ah Concert, Cosplay, Carnival hmangtea lawm a ni dawn a, free health check up buatsaih a ni bawk ang.
Aizawl Day lawmnaah hian February 21 (Nilaini) zing dar 6.30 ah Walkathon (kea kalhona) neih a ni dawn a. Ward tin atangin mi 30 kal chhuak tura beisei an ni a. Walkathon-a tel zawng zawngte hi T.Shirt pek tum an ni. Deputy Mayor R. Thanglura chuan A.R. Lammualah zing dar 7:00 ah Aizawl Day hawnna a nei dawn a ni.
Volleyball inelna Mayor’s Cup chu February 16 atangin tan a ni ang a, Ward inelna a ni dawn a. Hmeichhia leh mipa team awm ve ve tura beisei a ni a. Ward 19 chu Group-4 ah inthenin League-a khelh tur a ni a. Group champion-ten Final an khel dawn a. Lawmman tha tawk tak pek an ni ang.
February 21 atanga ni 24 inkarah Sipai Lammual-ah programme hrang hrang neih tur a ni a. Stall leh Exhibition chu a pui ber tur a ni a. A vaiin stall 60 awm tura ruahman a ni a. Lammual-ah hian Cosplay, Carnival leh bouncing castle-te pawh a awm tel dawn a. Aizawl Day ni tak, February 25 hi Pathianni a nih avangin February 24-ah Mayor hoin Sipai Lammual-ah a lawmna programme neih tur a ni a. Mizo zaithiamte zaina Concert-in a zui dawn a ni.
February 24-ah Faina Hnatlangpui neih a ni dawn a. Aizawl mipuite mahni chenna in bul theuhte lo tifai tura beisei an ni a. Corporator-te leh Local Council zawng zawngte faina hnatlangpui lo huaihawt tur hian ngen leh beisei an ni bawk a ni.
Aizawl Day lawmnaah hian Aizawl-a cheng kum upa ber hnenah chawimawina hlan tur a ni a. Cash award hlan a ni ang.
Aizawl day vawi 2-na lawmnaah hian Stall dil duhte tan Organising Committee chairman office-ah dilna form lakluha thehluh leh tur a ni a. January thla chhung dilna hawn a ni.
Aizawl Day vawi 2-na lawmna atan hian Organising Committee din a ni a. Executive Corporator Laltlanzova Khiangte chu chairman niin, John Zosangliana, Corporator chu Secretary a ni a. Vice Chairman Er. Lalhriatpuia, Municipal Commissioner leh Treasurer Vanlalruata, Asst. Commissioner-te an ni. Member-ah Corporator-te leh AMC Official mi 11-te ruat an ni.
AMC Mayor-in mipui ngen
AMC Area-a vawk vulh inkaihhruaina chungchangah vawk vulhtute hnenah inkaihhruaina dan zawm theuh turin turin AMC Mayor chuan mipui a ngen.
Inngaihhnathiamna hun Grace Period siam chu laklawh hun chhung insiamremna hun atan chauh a nih avangin vawk vulha ei zawng chhunzawm tumte chu hmun remchang lo ngaihtuah turin Mayor chuan a ngen nghal a; thupek zawm lo leh midangte tana hnawksak an awm a nih chuan AMC-ah report turin a ngen bawk a ni.
Property Tax chungchangah, online hmanga pek mai theih a nih tawh avangin mipuite hmang tangkai theuh turin mayor chuan a ngen bawk a, harsatna nei chuan AMC-ah zawh fiah theih a ni a. Proptery Tax chungchanga complaint duh tan AMC office-ah complaint thehluh theih a ni bawk.