Aizawl District Basketball Season Opening 2025 Player 800 chuang inlanna tur!

Aizawl District Basketball Season Opening 2025
Player 800 chuang inlanna tur!
Aizawl District Basketball Association (ADBBA) chuan a hnuaia division pathum – Division 1-ah club 9; Division 2-ah 16 leh Division 3-ah 39 zette chuan vawiin, June ni 23 (Thawhtanni) atangin knockout system-in season opening inelna an khel tan dawn a, July ni 10 zan dar 8-ah final khelh tura ruahman lawk a ni.
He team 64 lai mai inlanna turah hian ADBBA chuan June ni 20, Inrinni zan khan Zarkawt, Babutlang recreation center-ah managers meet a huaihawt.
He hun hi ADBBA president Pu Dennis Vanlalmawia chuan kaihruaiin, fixture tlangzarhna a nei nghal. ADBBA Secretary Pu Lalnunkima’n inelna neih tura hriattur puanzarna a nei zui a; technical secretary Tv. Lalbiaksanga’n zawhna inhrilhfiahna hun an nei bawk.
Mi 800 chuang lai inlanna tur hi Hawla Indoor Stadium, Republic Vengthlangah neih a ni ang.
ADBBA hnuaiah hian basketball players 856 an inziak lut mek a; division 1 atangin club 1 leh division 3 atangin club 2 tun tum inelnaah hian an inlan thei dawn lo thung.