Armed Veng Basketball Club buatsaih Aizawl East II invitation basketball tournament chu zanin, August ni 19, dar 7:30 pm atang hian Armed Veng Community Center-ah tan a ni dawn. Inelna hi a tum thumna tur a ni.
He intihsiakna hi neih theih a nihna turin East II bialtu minister Pu B. Lalchhanzova chuan senso tumin, ani bakah hian mi 19 zetin thalaite tuihalna hriain mamawh phuhrukna tur an thehchhuak bawk.
Armed Veng Basketball Club President Pu Lalduhsanga (Sangsanga) chuan, “Mizoram pumhuapa inelna buatsaih duh viau mah ila, remchan lohna tam tak a awm avangin East II huamchhunga thalaite tan tal tiin he inelna hi buatsaih kan ni. Mizo thalai ruihhlo vanga an nih tur ang ni phak lo tam tak karah hian ruihhlo do nan leh basketball chawi nung zelna tura buatsaih kan ni deuh ber mai” tiin he invitation tournament an duan chhan hi media partner The Aizawl Post Hoops Mania hnenah a sawi.
East II ah hian Dawrpui, Saron, Chhinga Veng, Tuithiang, Armed Veng, Armed Veng South leh Chite te an awm. He intihsiakna huaihawttu leh a thlengtu ni nghal bawk Armed Veng hi infiamna lama hmingchher tam tak lo hringchhuak tawhtu an ni a, an veng basketball player Dave-a leh Chpa phei chu Mizoram Super League (MSL) ah pawh star player lo ni phak hial tawh an ni.
Football leh Cricket lama an hniak hraw tak hnutchhiah ang nei thei turin basketball khelhna hmun hma nei tha vengah hian East II invitation champion nomawi hi haw thei tak maw – August ni 28 zanah a chiang ang.
He tournament tum hnih neih tawh a champion ve ve Saron veng hi an thiampuipa H. Laldinsanga (Mapuia) hovin an rawn thawkchhuak thin a, he veng tana khel tawnhriatngah zawk player-ten rawlthar zawk te kianga inrintawkna nei thei tura an khelhpui thiam leh an dawhtheihna hi veng dang te neih that loh a ni a; Saron tan hei hi an thahrui pawimawh bera chhal ngam a ni thung awm e.
Record pawimawh thenkhatte:
1. Champion (2023) – Saron Veng (MVP – K. Lalrinchhana, Saron)
2. Champion (2024) – Saron Veng (MVP – R. Laldinliana, Saron)