Aizawl FC in Chanmari FC an lehthal
Thawhleh zan khan tuilet hnu lama a vawi khat nan Indian Football League(IFL) ah Aizawll derby khelh a ni a. IFL a Aizawl derby hmasa berah Aizawl FC chuan si hnih an phurh hmasak zet hnuin Chanmari FC lakah hnehna an chang let a, point thum hlu tak an hmu. Chanmari FC hnehtu Aizawl FC hi pahnihnaah an inhlangkai.
Football ngaina Mizote nghahhlelh em em Aizawl Derby hian hlut a hlawh viau a, RG Stadium-ah Football ngaina Mizo te an pungkhawm thahnem hle. Mipui nghahhlelh ang ngeiin inkhel hmuhnawm tak hmuh tur a awm a, goal 5 luhna inkhelah si hnih phur hmasa Aizawl FC in pui zetin hnehna an chang let. Aizawla club hlun pahnihte an inlehthal kual vel hi a hmuhnawm tak zet a, inkhel entute mit a tlai tak zet!
Indian Football League a Aizawl derby ah Chanmari FC in bul an tan tha viau a, goal pawh an thun hma hle. CFC tan hian Malsawmsanga Renthlei chuan inkhel tan atanga minute 19-na lekah tha zet si vanneihthlak ang reng takin hmahruaina goal a thun. Sawmsanga’n hla tak atanga a pet chu Aizawl FC si nghak Lalhriatpuia chuan vanduaithlak takin a man pial a, ho takin an lamah a lut ringawt. Hma takah goal an thun hian Chanmari FC a chawk phur viau a, I League champion hlui Aizawl FC lakah inrintawkna sang zawk nen an inlan.
Goal thun hmasa zawk Chanmari FC hian an khingpui Aizawl FC an ngam zui viau a, goal thun tumin an nawr zui nasa hle. Goal thun theihna hun tha neiin, hlauhawm siam zui nual mah se an hun tha neih an chhawr tangkai thei lawk lo. An hun tha neih hlah thin bawk mah se chawlhlawk dawn hnaihah hun tha lehzual an nei a, penalty an hlawhchhuak. Penalty hi Tche chuan minute 44-naa a pet goal a, an goal hnihna a thun. Aizawl derby hmasa bera bul tan tha tak Chanmari FC hian 2-0 a hmahruai chungin chawlhlawk an hmang.
Chawlhlawk hmain khel tha lo mah se chawlhlawk hnu lamah Aizawl FC chu team thar hlak ang maiin an inlan a, champion zia chhuahin goal thum ngawt an thun ta hial. Goal thun mamawh Aizawl FC tan hian Lalduhawma chuan minute 52-naah goal thunin an si phurh a sut then. Duhawma goal hian Aizawl FC a chawkp phur a, an mahni tantute ngui nghuai tawh pawh thal pangpar tui pek ang maia vul thar in, hnah no an chhuah thar leh. An mahni tantu ten nasa taka au phurin, mualchhunga mite thahrui an pek belh. An si phurh sut ngei tuma tan khawh AFC tan hian Lalsangzuala chuan minute 67-naah goal a thun a, an si phurh a sut zo ta nge nge.
An si phurh an sut zawh hnuin Aizawl FC chu chakna chang tawh ang maiin an phur a, nuam ti takin an inlan chhunzawm. An si phurh an sut atanga minute thum hnu lekah an si phurh sut zotu Lalsangzuala chuan hma an hruai letna goal a thun zui leh zat. Sangzuala goal thun hi hun tawp thlengin an venghim a, si hniha an hnufual hnuin Chanmari FC lakah hnehna an chang let a, Aizawl FC chuan Indian Football League-a Aizawl derby hmasa berah 3-2 in Chanmari FC an hneh a, hnehna chhinchhiahtlak an chang.
Chanmari FC hnehtu Aizawl FC hian khelh 5 atangin point 8 an hmu a, table-ah pahnihna an luah. Table chung ber luahtu Diamond Harbour nen point khat chauhin an inthlau a, an muala an hneh loh Diamond Harbour ai hian vawi khatin an khel tam zawk thung. Aizawl derby ah uiawm taka tlawm Chanmari FC hian khelh 5 atangga point 5 hmuin pasarihna an luah mek a, Mi dang aia an khelh tam zawk vangin tlahniam thei dinhnumah an ding thung.
Aizawl FC in Chanmari FC an lehthal
