August 8, Thawhlehni khan I-Day Football tournament khelh chhunzawm a niin Group A te an inching fel a. Aizawl FC leh Chanmari FC ten semi-final an lut. Vawiin hian Group B a mite an inching fel zui ve leh ang.
Aizawl FC 4-1 FC Venghnuai
Group A-a vawihnih chak zawn tawh a, hmahruaitu ni mek Aizawl FC chuan point thum hmu tawh FC Venghnuai an hmachhawn a. An khingpui lakah si an phurh hmasak zet hnuin 4-1 in hnehna an chang let a, group champion ni chungin semi-final an lut.
Semi-final lut thei tura chak mamawh FC Venghnuai hian minute 30-naah penalty an hmu a. C. Ramdinmawia penalty pet goal hmangin AFC lakah hma an hruai. Goal thun hmasa zawk an nih vangin lawm viau mah se an lawm rei lo viau a, goal an chhuah zui thuai thung. Penalty an pet goal atanga minute khat hnu lekah R. Lalthanmawia chuan goal thunin Aizawl FC si phurh a sut a, 1-1 a inhnehtak chungin chawlhlawk an hmang.
Chawlhlawk hnu lamah AFC an khel tha zui viau a, goal thum an thun belh. Minute 58-naah R. Lalthanmawia chuan hma an hruai letna goal a thun a, minute 64-na lekah an hmahruaina tizau turin R. Lalthanmawia hian penalty pet goal in goal dang a thun belh zui leh a, hattrick a siam. 3-1 hma an hruai hnu hian minute 73-naah P. Lalrinzuala chuan an goal lina a thun zui leh bawk. Rinzuala goal luh hnuin goal dang a luh belh thei lova, Aizawl FC hian 4-1 in hnehna an chang zui ta a ni.
Chanmari FC 4-1 Electric Veng FC
Group A a inkhel dangah point thum hmu tawh Chanmari FC chuan point la hmu lo Electric Veng FC an hmachhawn a, 4-1 hnehna changin semi-final lut tura an mamawh point an hmu.
Chanmari FC hian Electric Veng FC lakah bul an tan tha viau a, chawlhlawk hmain goal thum an thun hman. Inkhel tan atanga minute lina lekah Vincent Lalduhawma’n hmahruaina goal a thun nghal. Hma takah goal an thun vangin inrintawkna sang zawk nen Chanmari FC an inlan chhunzawm a, chawlhlawk hmain goal hnih an thun belh leh hman.
Minute lina leka goal an thun hnu hian goal hmahruai thuntu Vincent Lalduhawma vek hian minute 21-naah an goal hnihna thunin an hmahruaina a tizau. Goal hnih an chhuah zawn hnuin Electric Veng FC an insiamtha a, goal an thun ve ta thuai. Minute 23-naah KC Malsawmsanga chuan goal thunin an si phurh a sut then a. He goal hmang hian point hlawhchhuah theih beiseina thar an nei. Goal thun vangin EFC phur viau mah se CFC in minute 36-naah Felix Lalruatsanga hmangin goal an thun belh zui leh a. An khingpuite beiseina an tihthlawnsak.
Chawlhlawk hnu lamah CFC tan minute 51-na lekah Laltlanzova chuan an goal lina a thun a, an hmahruaina a tizau. Hemi hnu hian goal dang a luh belh thei tawh lova, CFC in 4-1 a hnehna changin semi-final an lut ta a ni.
Vawiin hian inelna neih chhunzawm a ni ang a, Group B a mite an inchingfel zui ve leh ang. Point 6 hmu tawh Chhinga Veng FC in point thum hmu tawh Chawnpui FC chu chawhnu dar 1:00-ah an hmachhawn ang a. Point thum hmu tawh Mizoram Police FC chuan point la hmu lo Project Veng FC chu chawhma dar 11:00-ah an hmachhawn ve thung ang.
Aizawl FC leh Chanmari FC in semi-final an lut
