Daily Newspaper

Aizawl inkharkhip-ah mipuiin thu awih

47

Aizawl, August 18 : Covid-19 laka inven nan Aizawl khawpui a inkharkhip leh a, Chawlhni zanah total lockdown hi intanin, mi an reh nghal hle. A tukah pawh Aizawl khawpui a reh a, March leh April vela inkharkhip vanglai ang mai kha a ni.

Khawlai a reh a, hmun lun laiah pawh mihring leh lirthei hmuh tur a awm meuh lo. Dawr a inkhar thuap a, damdawi dawr pawh inkharkhip hmasa lam aiin inhawng an tlem.

Police-te pawhin mi an reh thu hi an sawi a, thuawih lova chhuak lui an awm meuh lo tih an sawi.

Khawlaia duty police-te chuan chhuakvak an awm meuh lo tih an sawi a, khawlaia chhuak an endikte pawh phalna nei an nih zel thu an sawi. Hmun lun lai Dawrpui phei, Treasury Square vela police-te pawhin dan zawm lo an hmuh loh thu an sawi.

Chhuah phalna hi DC leh traffic SP-in an pe thei a, khawlaia duty police-te chuan phalna neia chhuak an hmuhte chu inentir tur leh damdawi lei tur te, thil pawimawh vanga chhuak an nih thu an sawi. Sorkarin chhuah a phalsak, essential service lama thawk ni lo khawlaia an hmuhte chu phalna nei an ni zel tih chu hmun hrang hranga police-te sawi dan a ni.

August ni 16 tlaiah health minister leh home minister hovin sorkar mi pawimawhte’n Aizawl khawpuia total lockdown puan hi an rel a, chief minister-in a pawmpui hnuah ni 16 zanah puan nghal a ni. He inkharkhip atana inkaihhruaina te duan nghal niin, zanlaiah puanzar a ni.

He inkharkhip puanna order-ah hian inkharkhip puan chhan a chuang a, “tun hnaia state chhunga Covid-19 case hmuhchhuah thar zingah primary leh secondary contact zinga positive engemawzat an tel tak avangin mipui mimir zingah he hrik hi a darhzau zel loh nan mipui pawn veivak tam rih loh leh economic activity pawh khuahkhirh rih a tul nia hriat niin, hemi hunchhung hian chak zawka COVID positive te contact-te test a niha, high risk group zinga random testing tih a nih theih bawk nan” tih a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy