Daily Newspaper

Aizawl inkharkhip leh dawn

12

Aizawl, September 11 :  Covid-19 hrileng laka inven nan Aizawl khawpui a inkharkhip leh dawn a, State Executive Committee chairman Lalnunmawia Chuaungo, chief secretary chuan hemi atan hian Ningani zan dar 9 vel khan order a chhuah.

He inkharkhip hi ‘partial lockdown’ a ni ang a, September ni 10 zan dar 12 atanga September ni 17 zan dar 11.59 thleng a awh ang. Aizawl Municipal Corporation huam chhungah he ‘partial lockdown’ hi puan a ni.

“Aizawl municipal area huam chhunga chengte phalna nei lovin tumahin mahni in leh compound an chhuahsan tur a ni lo,” tiin order-ah chuan an ziak.

Mipui chetvelna a pun avang te, tun hnaiah hri kai an pun avang te, positive contact vanga kai leh an kaina hriat loh a pun avang te, community spread a thleng ang tih a hlauhawm avangtein inkharkhip tur a ni tih order-ah chuan a lang.

Pawn lam atanga Aizawla luh leh Aizawl atanga hmun danga chhuah te khap a ni a, phalna neite erawh a huam lo ang. Ni tin mamawh thil lakluh phal a ni a, ni tin mamawh thil zawrhna dawr inhawn chungchangah bawrhsap leh LLTF-in ruahmanna an siam ang. Damdawi dawr tih loh chu tlai dar 5 thleng bak hawn phal a ni lo tih a ni thung.

“Zirna in, training institute leh sakhaw biakna hmunte chu khar chhunzawm zel a ni ang,” tiin order-ah hian an ziak a, under graduate examination kal mek chu chhunzawm tur tih a ni thung.

Mitthi vuinaah mi 50 aia tam punkhawm khap a ni a, mitthi vui chungchangah hian August ni 13-a order chhuah tawh kha khauh taka kenkawh tur an ti.
Ningani khan health minister Dr R Lalthangliana, home minister Lalchamliana leh information minister Lalruatkima te, Medical Operational Team on COVID-19 leader Dr ZR Thiamsanga, MLA te, chief secretary leh sorkar official pawimawh dang te, NGO Coordination Committee hruaitute leh Mizoram Kohhran Hruaitute Committee aiawhte an thukhawm a, inkharkhip hi an rel a ni.

Mahse sorkar laipuia ministry of home affairs-in September thla chhunga inkaihhruaina tur a duan chu ngaihchan a ngaih avangin, anni lam rawn chunga ruahmanna siam ni se tiin an rel a. An ban hnuah hei hi bawhzui niin, inkharkhip chu puan a ni ta a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy