Aizawl-a jail pathum awm chu kumtluanin a leng tur zat bituk sa aia tam fe an awm reng a. Aizawl bakah hian Lunglei leh Champhai jail pawh a heti kumtluan. Jail tang hi nitin lut leh chhuak an awm zut reng a, tang zat an danglam ve reng. Prison department-in a chhinchhiah dan a tihchhuah hnuhnung ber, October 31 thleng kha chuan Central Jail Aizawlah tang 922 an awm. He jail hi mi 480 leng tura sak a ni a, tang thei tur bituk zat let deuhthaw an tang mek tihna a ni.
Hmeichhia bik tan Central Jail a awm hrang tawh a, mi 96 leng thei tura duan a nih laiin, tang 152 an awm. District Jail Aizawlah pawh tang dah theih zat bituk aia tam an awm kumtluan a. Tang 90 awm theihna tura duanah tunah hian 154 an awm.
Aizawla jail pathum bakah hian tang awm thei zat bituk sa aia tam kumtluan deuhthawa tang reng tih theih chu Lunglei District Jail leh Champhai District Jail a ni. Lunglei Jail hi tang 109 awm theihna tura duan niin tunah 136 an awm mek a; Champhai Jail hi tang 105 awm theihna tura duan niin tunah 200 an awm.
District Jail dang ho hi chu tang awm thei tura ruahman zat ang hi kumtluanin an awm lo tih theih a ni thung a. A bikin Serchhip, Lawngtlai leh Mamit jail ho hi tang nei tlem zual an ni reng tih theih a ni. Tunah hian Serchhip District Jail-ah tang 82 an awm a, mi 128 tan theihna tura duan a ni. Mamit District Jail hi tang 96 awm theihna tura duan niin tunah 68 an awm. Lawngtlai District Jail hi tang thei zat atanga chhut chuan tang nei tlem ber pawl an ni kumtluang ve thung a, tang 98 awm theihnaah tunah hian 27 an awm.
Hetihlai hian tunah Saitual District Jail tur duan mek a ni a, mi 68 awm theihna tura ruahman niin, tang an nei rih lo.
Heti hian tun dinhmunah Mizorama jail 11 awmah tang awm thei zat belhkhawm chu 1496 a ni a, tuna tang mek zat chu 1903 an ni. Heng zingah hian an nute an tan avanga awm ve naupang 15 an awm mek.
Tang 1903 zinga 56 hi dam chhunga tang tur an ni a; court-in an chungthu a rel hnua thiam loh a chantir, hrem an nih hun chhung hmanga jail tang mek 645 an awm a; a bak zawng hi chu an chungthu court-in a ngaihtuah mek an ni.
Aizawl jail ho a tawt ngaiin la tawt reng
