Aizawl khawlai a lun telh telh

Aizawl khawlai a lun telh telh a, ruihhlo vanga lun telh telh a nih chuan thil lawmawm lo tak a ni ang; mahse chutiang chu Aizawlin a tawng tlat.
Aizawl khawlaiah ruihhlo buaipuiin mi an phu suau suau a ni ber a, hmun lun laiah te hian ruih tur zawng an phe suau suau mai. Chu chu thil thar a ni lo a, tun hnaiah a lun zual tih erawh thu thar a ni ang.
Treasury Square vel a lun kum tluan a, tun hnaiah ruihhlo buaipui an pung niin a lang. Kawng sira thil zuar pakhat chuan, “Awi, an inzui hut hut mai. Tunlai hian an pung a, a hmaa kan hmuh ngai loh pawh an tam mai,” tiin a sawi.
Vanapa Hall bul vel hi ruihhlo zawrhna hmunpui tia sawi ngam a ni a, kum hmasa lam atang tawhin ruihhlo lei duh chuan an pan mai thin tiin a sawi theih ang. An zuarin an lei a ni mai lo a, an rui nghal thin bawk.
Vanapa Hall bul vel leh a hnuai velah hian thil hmuh hrehawm tak tak hmuh tur a awm thin a, inchiu mawlh mawlh lai hmuh tur a awm thin. A chang phei chuan an thu kual a, a huhovin an inchiuvin an rui thin. Heng lai vel hi tunlaiin a lun zual a, mi office chhung titiha luta inchiu ta mai te pawh an awm.
A bul vela dawr nei pakhat chuan, “Hmuh a hrehawm khawp mai, an khawngaihthlak bawk si. Kan hawi tha ngam lo a ni ber a, thil lo lak zeuh lah hi an thiam si a,” tiin a sawi a, tun hnaiah ruihhlo buaipui an pun thu a sawi bawk.
“Mi hian heng lai velah rui an pung an ti a, mahse mi tam berin an hmuh hi chhun a ni a. Keini chuan zing kar atangin kan hmu a, chhunah aiin zingah an tam zawk,” a ti a, “Zing hma tak tak atangin an inzui a, hmeichhia, tleirawl te te pawh an pung,” a ti bawk.
Aizawl hmun dangah pawh zalen takin ruihhlo an khawih a, a hmu thinte sawi danin, a zuarte hi scooty-in an kal a, a leh duhte’n an lo bawr hat thin. Hmun lun laiah chutianga ruihhlo lei theih mai chu a ni a, an rui nghal mai bawk.
Central YMA hnuaia ruihhlo dotu pawl CADS (Central Anti Drug Squad) te’n theih tawp chhuahin khawlai thenfai hna hi an thawk a, ruihhlo buaipuitu pawh an khawm hnem tawh. Counseling class te an kaltir a, home-a dah te pawh an nei. CADS te inpekna avang hian khawlai pawh a fai duak lai a awm a, mahse, a hautakzia hi CADS lam pawhin an sawi.
Thu dawn pakhatah chuan, tunlai hian ruihhlo hi a vang a, hei vang hian ruihhlo ti thinte’n an zawng nasa a, an zawn luih luih avangin khawlai pawh a lun zual tih a ni.