Ruihhlo a hluar a, Aizawl khawlaiah a zalen hle. Aizawl hmun lun laiah ruihhlo hi zalen takin an zuar a, Aizawl khawpui laili-ah ruihhlo leh a sulhnu hmuh tur a tam hle.
Ruihhlo hi zalen takin an zuar a ni mai lo a, a lei leh hralhna hmunah hian zalen takin a ruih nghal theih.
Sorkar hmun pawimawh Treasury Square vel te, Vanapa Hall bul vel te, Zodin Square velah ruihhlo hi a zalen a, Aizawl Lei velah pawh a zalen. Hmun dang, ruihhlo zalenna hmun paw a tam mai.
“Kal tlang pawh a hrehawm zawk alawm le. An leiin an hralh a ni mai lo a, an lo inchiu mawlh mawlh mai a, kan inthlahrung rum rum mai alawm le,” tiin pa pakhat chuan Vanapa Hall bul vela kea kal inthlahrunawm a tih rum rum thu a sawi.
Heng lai vela dawrkaite pawhin an hauh chang a awm a, mahse inhauh sen a ni lo.
Treasury Square leh Zodin Square inkar hi ruihhlo ti thinte kalkhawmna hmun a ni mek a, anmahni chuan a hlawm tam thama lei kher a ngai lo a, tlem te tea lei theih a nih avangin heng lai vela kal hi a remchang an ti.
Heng lai vela kalkhawmte hi an inthlahrung ve tho a, an sulhnu han tihfai chang te pawh an nei.
Kawnga kal pahin ruihhlo an lei lai a hmuh mai theih a, inchiu mawlh mawlh lai a hmuh theih. Muthlu lawp lawp an awm a, khawngaihthlak tak tak hmuh tur an awm thin. Tunlai hian a zual niin a lang a, chhun engah ruihhlo leh a sulhnu hi a langsar hle.
Aizawl khawlaiah ruihhlo zalen
