Home minister K Sapdanga hoin a kaihhnawih department leh pawl chuan Ningani khan Aizawl khawpui himna tur an sawiho. Thutkhawmah hian tunhnaia Aizawl khawpuia ruihhlo ti thin khawlaia veivak tam thu, ruihhlo avanga thihna thleng leh mipui nawlpui himna lam sawiho a ni a. Tawngtai Bethel Camping Centre atanga vawi leh khata tam tham tak chhuak avanga harsatna awm theite pawh sawi a ni.
Home minister chuan Aizawl himna turin Police, Excise & Narcortics leh Central YMA thawhhona a pawimawh, tiin, an thawhho that vangin lawmawm a tih thu a sawi. Aizawl boruak thlirin tanrual a tul tih a sawi a ni.
Excise & Narcotics minister Lalnghinglova Hmar chuan, sual do kawngah sawrkarin theihtawp a chhuah bakah Central YMA an che chhuak thin leh, ruihhlo ti thinte avanga harsatna awm sutkian kawngah pheikhai rual taka an kal zel thei chu lawmawm a tih thu a sawi a. Tunhnaia Aizawl boruak thlirin inthlahdah loa tanrual zel a tul tih a sawi.
Aizawl SP Rex Zarzoliana Vanchhawng chuan tunhnaia police-in Aizawl khawpui venhim hna an thawh dan report a pe a. Chhunzan zawmin an duty thin a, tunhnaiah bik tan an la nasa tih a sawi a ni.
Excise & Narcotics commissioner Z Lalhmangaiha’n an department-in tunlaia Aizawl leh district khawpui danga zan lama special drive neia zu leh ruihhlo an ven dan, tunhnaia ruihhlo man kawnga hma an lakna leh hmun pawimawh bika an duty thin dan a report a ni.
Social Welfare commissioner & secretary Lalzarmawii’n sawrkarin ruihhlo ngai enkawlna hmun a neih dan, seat awm zat leh an enkawl mekte a report bakah ruihhlo ngai tam zawk enkawl thei tura sawkarin ruahmanna a neih a sawi.
Central YMA president Lalhmachhuana chuan khawtlang himna tura YMA hmalak mek dan, ruihhlo do tura Central Anti Drugs Squad hnathawh dan report pe in, a tul anga Aizawl khawpuia branch hrang hrangin zan lama venhim hna an thawh dan a sawi a. CYMA hruaitu dangten khawpui himna tura hmalak mek leh rawtna an neih an sawi bawk.
TBCC atanga chhuak tam tham tak an awm avangin venhim hna chak taka kalpui zel a tul dan sawi a ni a. Khawpui himna turin vengtina khawtlang hruaitute nen thawhhona tha neih a tul thu leh, kohhran hrang hrang pawh ruihho ngaite enkawl kawnga thawhpui thiam zel a tul thu sawi a ni.
Aizawl khawpui himna tur sawiho
