Reuben Lalnunthara hnamte
Aizawl khawpui hi a thang chak hle mai a, kan naupan lai kha chuan Town Bus-ah pawh Bus lianchi kha a tlan vut vut thin a, traffic Jam a awm pawh kan hre ngai lem lo kha ania. Motor register pawh ZRM leh Sorkar motor ZRG kha a awm thin a, tunah chuan ZRM chu sawi loh MZ –O1 AA register pawh a hnuhnung lam a ni leh tawh a. Taxi-ah te khan Ambasador Car kha a tlan tung tung thin a, tunah chuan Maruti 800 pawh a thing lam deuh tep tawh a, Two wheeler Taxi pawh a maka maka tam a awm ta hial a ni. A mihring cheng lah kan pung tual tual a, lirthei lah a pung tual tual bawk a; chutih laiin a kawngpui lam lah a zauh belh der chuang si lova, kan inhnawh khawm a ni ber tawh mai a nih hi. In lah hi compound pawh awm thei lovin insi deuh khep khupin a awm tuarh mai a, khampang ni maia kan ngaihah te pawh kan inham tang ta fer fur mai zawng a nih hi. Lirthei chhuak thar a awm reng a, company hrang hrang an intlansiak a, company hrang hrangah dealer lah an awm fer fur tawh a, tunah chuan kan khawpui zawh loh khawp lirthei kan nei a ni ta ber mai.
Aizawl Traffic police hi khawvelah a thawkrim ber an ni hial mai lo maw te ka ti hial thin. Hman deuh kha chuan taxi khawpui tih hial thin kha nia, tunah chuan Sikuti (scooty) lo chhuah chinah hian Two wheeler khawpui tih hial awma mawi a ni tawh maithei a ni. Khawvelah hian a mihring tam lama chhuta lirthei tamna ber a ni hial mai angem aw tih hial tham a ni. Thuneitu lam pawh hi an lu a hai ve thin ngawt ang chu. Motor register thar ho lah lirthei dahna (Garrage) nei lo a insawi an awm miah lo va, kawng sira motor dah lah a tam viau lawi si. Thuneitu lam hian fair takin han check ngam se chuan motor nei thar thei lo tur hi Aizawl khawpui chhungkaw chanve deuhthaw hi chu kan awm hial maithei a sin. Kan kawngte hi a zim chhe lutuk miah lo; mahse, kawngsira motor park tam lutuk hian kawng a ti zim a, hei hian kawng a titawt belhchhah ve bawk a. Kawngsira insate lahin kawngpui zuah lo thei ang bera in sa hi mi tam tak an awm a, hei hian kan khawpui chu a ti tawt lehzual.
A dik tak chuan Dan aiin, inhmelhriatna leh in laina hnaite an lal zawk emaw tih mai tur a ni a, milian leh thiltithei deuh an lal hle bawk. Dan a nih ang taka chelek ngamlohna ram, milian leh thitlthei te leh inhmelhriatna lalna ram a nih chhung chuan hmelhriat nei lo leh thiltithei ve lem lote chu kawng hrang hrangah tun ai hian kan chep tulh tulh dawn. Ram changkangah te chuan miin kea kal leh public transport hmante an intihhmuh tawh a, keini ve zawng mamawh lem lo pawhin neih talh kan tum a, changkan tumna changkang lem lo a ni mah zawk mai lo maw? Ke hian kan kal tlem lutuk a, kan eitui tawh bawk sia, kan hrisel loh em hlawm hi maw. Thihna lah hi a tam em em a, veng tinah mitthi an puang awl lo mai zawng a nih hi. Kan Aizawl khawpui chu lirthei khu a tam tawh si a, thing a tlem tial tial a, kan environment-in a tuar a, boruak bawlhhlawh zel hi kan hmabak chu a ni ve ta. A kum telin a lum tual tual a, tuichhe paihna leh bawlh;lawh paih kan fimkhur loh avangin kan tuar zel dawn a ni.
Aizawlah hian ke pahnih nei hi ka khalhna a lo rei ve ta hle a. Rajdoot 350 atang khan ka lo khalh ve tan sawih sawih tawh a. Khang laia Bike nei ho kha chuan Kulikawnah panhnah an la a, bawngkawnah chinai an va pir a te an ti vel mai mai thin kha nia, tunah chuan Kulikawn leh bawngkawn inkar kal chhung pawh a rei ta. RX 100 lo chhuah hlim khan, kan u pakhat hian a lei ve a, khang lai chuan singhnih chuang man awrh a ni a. Aizawlah hian meeting kan nei a, kan resource person turin Delhi atangin vai pakhat sang leh lian deuh hi a lo kal a. Nikhat chu kan hotu ten ‘Dawrpui atangin lunch ei turin a hotel thlennaah va thlah ta che, nang Bike i nei bawk a’ min ti a. Ka huphurh khawp mai a, chutih nak alai chuan bike a rawn thu chu hmeichhe chuanin a sir zawngin a thu ta hu mai lehnghal. Bike a lian vak si lo, kei lah ka la khalh thiam lutuk si lova, kan inphur phei chu a che hrut hrut lehnghal a, a steering ven a’n har khawp a; tunlai anga Traffic tawt tak ni se chuan kalpui ngaihna a awm lo viau ang. Steering sai phei deuh ngawr ngawrin kan tum ram chu ka thlenpui ve hram a, traffic lo duty te lah chu an nui deuh vur vur bawk a, zahthlak duh zawk tak a ni.
Kan khawpui traffic tawt nak alai hian a then lah chu kawngpui laiah an lo in turn ve sek a, a then lahin an lirtheite kawng sir tawt deuh laia lo ding tlat te, lo park tlat te an awm thin a, hei hi a huatthlalaawm thin ngawt mai. Ke pahnih nei khalh ho lah hi an hmanhmawh em em reng a, intlansiak ta ni awm tak hian an tlan a, ‘ka pu a thi tep’ ti ni awm tak hian mi an pel thuak thuak bawk a, chuhhelh fe fe hi an kat nawk a ni. Hmaa motor pelh tum hrim hrim ringawt tawk lah bo lo. Khawpui chhungah hian CCTV lah hi an la dah tlem khawp a, an dah chhunte hi hmantlak tak maw? Veng kil deuh thleng hian CCTV hi awm vek se la, kawngpui ni lova, helmet khum lo va tlan mai maite hi man hmiah hmiah se a tha tur a nia. Helmet khum loh avanga thihna a tam a, kum tlinglo lirthei khalh avang thihna lah kan tawk tam tawh bawk. Kan sorkar hian security hi tun ai hian tichangtlung se, kawngpui ngawt lovah hian CCTV awm se, vil hneh bawk se la, accident pawh hi a tlem deuh ngeiin a rinawm.
Kawngpui an a, motor parking-ah pawh hian tun aia fimkhur a ngai. Motor lian deuh deuh hma lam thlir theih miah lova park te hian accident a thlen thei tlat. Tun laia motor parking hi uluk leh ngun zawka kan thuneitu ten an vil a ngai. Vairengtea ka awm laiin sipai ho hmunpuiah ka kal a, ka fapa sikul-a hruai turin, kawngpui kawi lai zau deuha ka sikutar dah mai ka tum a, sipai duty khan a phal hlek lo mai a; “ Ngatinge” tiin ka zawt a. A ni chuan “Kawng kawi laia motor park hian accident a thlen thei a dah phal a ni lo” a ti tlat mai a ni. Aizawl khawpui chhungah hi chuan kawng kawi lai a ni emaw ni lo emaw pawh hi kan ngaihtuah lo va, a remna hmun hmunah hian kan side/park tawp mai a, midang tana chep tur lam ngaihtuah miah lo hian hei hian traffic jam a ti tamin, accident a thlen thei bawk. Thuneitu lam hian CCTV atang hian vil reng mai se la, veng tlabirh deuh thleng hian. Dan bawhchhia chu chawplehchilh hian a hmunah intirin man ngahl emaw, zilhhau nghal zel se; tin, pawisa chawi pawh hi tam deuh se la, kan la sim mai chu a rinawm. Kawngpui sira motor dah hi tun ai hian tlem se la kan kawngpui hi chuti taka chep a ni lo va, awmzia a awm ngei ang.