Aizawl khawpui tui lakna Tlawng tui pump chu a pangngai angin a kal leh thei tep tawh tih PHE hotute chuan an sawi. PHE department hotute sawi danin, May 28-a Cyclone Remal-in Mizoram a nuai ni, zing dar 5.20 atangin tui lakna Greater Aizawl Water Supply Scheme (GAWSS) Phase I & II chu tui pump thei dinhmuna a din tawh loh avangin khawl zawng zawng tihtawp vek a ni a. Tui lian hian an khawl leh hmunhma a chim chhiat nasat bakah len bo pawh a ngah hle a; GAWSS-I in a tuar nasa zual tih an sawi.
June 1 zing dar 1.45 ah GAWSS Phase-II pump pakhat hmangin Tuikhuahtlang tuizempuiah tui pump luh leh tan a ni a. Cyclone thlen hma khan nitin tui thianghlim litre maktaduai (MLD) 29 vel pump chhuak thin ang an nih laiin, June thla khan MLD 15.91 velah
a tla thla a, July-ah MLD 21.84 tling chho lehin, August-ah chuan MLD 28 vel an pump leh thei tawh a ni.
Tuilianin a tihchhiat tui pump khawl 6 leh control panel pahnih chu Guwahati-a siamtir mek niin, siamthaa an ngaih tawh chu trial run an neihah beisei a pha loa, siamthat nawn tirin karleh lamah chuan khawl thenkhat hi chu hman theih an beisei tawh tih an sawi.
He harsatna sutkian kawngah department thawktute bakah pawl, mimal leh department dangte an tangrual hle tih an sawi bawk.
Fur lai a nih avangin ruahsur changin tui a nu thin a, pump hleihtheih loh khawpa nut chang a nei fo tih PHE hotute hian an sawi a. August 13 pawh khan Tlawng tui hi a thianghlim (NTU 11) em em laiin, vawiin August 14 zing dar 9.00 a an teh lehnaah chuan NTU 600 a kai chho leh hman tawh tih an sawi a. Tui nu hian tui pump kawngah harsatna a siam nasa thin hle tih an sawi a ni.
Kumin May khan Aizawlah tui connection nei 79322 an awm a, Aizawl Water Supply Scheme Phase-III (SIPMIU) in ni khatah litre maktaduai 10 a pump chhuah thin avangin consumer tam zawkin tui vawihnih an dawng thei a, consumer thenkhat vawithum dawng hman pawh an awm. June-ah connection nei 79362 an awm tawh. Cyclone-in tui pump khawl a tihchhiat avang khan pump chhuah a tlem a, June khan vawikhat emaw vawihnih emaw dawng hman connection 79004 awmin, dawng hman lo connection 358 an awm.
Aizawl khawpui tana tui lakna a pangngai thei tep
