AMRUT 2.0 hnuaia PHE Department project kalpui mek, Aizawl thli Luanna tur a siam mek chu Inrinni zan khan PHE minister Prof Lalnilawma’n a tlawh.
Aizawl khawpui chep takah septic tank thli luanralna tur soak pit nei tha lo leh nei mumal lo an tam a. Septic tank thli kalna mumal awm lo leh vantlang drain/luikawra luantir ta mai an thahnem hle tih al. Hei bakah hian septic tank sak dan dik tawk loh avanga paih ruah ngai a tam hle bawk a; septic tank tui hi a rimchhiat piahlamah natna hrik tam tak pai a nih vangin him taka deh ral a tul tih sawi a ni.
Hei hi Aizawl dinhmun a nih avangin mipui hriselna atan Public Health Engineering Department (PHED) chuan project – “Sewerage & Septage Treatment Works for Zone-7 Aizawl City Small Bore Sewer, (AMRUT 2.0)” a kalpui a. Rs. 37,76,85,198 senga thawh zawh tur niin, Ace Alliance Pvt. Ltd. Guwahati chuan a thawk. 2024 August 5 atanga thawk tanin kumin August 5 kum hnih chhung) a zawh tur a ni. Project zawh atanga kum hnih chhung, 2028 August 5 thleng contractor hian an enkawlin a vil zui dawn a ni.
Pipe phum tur hi km. 31.41 a thui a ni a, tunah km. 8.6 a thui phum a ni tawh. Pipe phum hna hi zan dar 9.00 atanga a tuk zing dar 5.00 thleng thawh thin a ni. He project hian Tuikual Luia thli luang veng hrang hrang 10 – Chawnpui, Tuikual North, Tuikual South, Dinthar, Dawrpui Vengthar, Vaivakawn, Kanan, Khatla, Dawrpui leh Zarkawt Veng hmun thenkhat atangin a lakhawm dawn a ni.
Heng veng 10-ah hian pipe phum tur a ni a. He hna hmang hian ek thli hi tui dawt hmanga lakhawmin a sawngbawlna hmun tur (Treatment Plant) ah sawngbawl thianghlim tur a ni. Ek thli leia thamral emaw luikawra paih thin tihbona hmanrua a ni dawn a. Hei hian soak pit mamawhna tiboin vantlang hriselna atan hmasawnna a thlen dawn bakah leimin laka invenna a nih tel beisei a ni. He pipe hmang hian septic tank atanga thli lakkhawm hi sawrkar ram MINECO ah a tihthianghlimna hmun – Sewage Treatment Plant-a sawngbawl tur a ni a. Heta thli tihfim tawh hnu hi leitha leh thildangah tangkai taka hman leh theih tur a ni.
STP hian nikhatah ek thli litre maktaduai 3.5 a tithianghlim thei dawn a. Septic tank khat tawh, ek paihna tur mumal a la awm loh avangin he project hnuaiah vek hian ek paihna tur – Faecal Sludge Treatment Plant (FSTP) pawh STP hmunah hian a awm nghal dawn a ni.
Aizawl mipui inthiarna thli luan khawmna tur pipe phum mek
