Aizawl mipuiin ‘black out’
zawm tha tawk loah ngai
District Disaster Management Authority Aizawl hotute chuan Nilainia indo thlawhna hmanga beih kan nih dawna lo inralrinna atana eng tih thih vek leh lirthei tlan lai pawh tih thih vek – black out chu Aizawl mipuiin an zawm tha tawk loah an ngai tih an sawi.
Chief secretary Khilli Ram Meena kaihhruaiin Nilainia Civil Defence Mock Drill neih tak thlirletin Ningani khan thutkhawm a ni a. District tina bawrhsap leh SPolice-ten inbiak hmuh theihna hmangin an chhim bawk.
Indona-in min nanchilh thulha chhiatna nasa tak thleng thei laka lo inven dan tur emaw a tuarnep deuh dan emaw tun atanga ruahmanna fel tak siama inpuahchah that a ngai tih chief secretary hian a sawi a. State leh district level-a Advisory Committee din, district tina satellite phone pahnih tal theuh neih, hot line neih, thingtlang kilkhawr zawka awmten information an dawn theihnan Akashvani hman tangkai thiamte tul a tih thu a sawi.
“Indona a lo thlen thulha ‘black out’ pawimawh zia hi mipuiin kan hriatchian hle a ngai. A bikin zirlaite zingah awareness campaign ngawrh taka kalpui a tul,” a ti. District tin bawrhsap-te chu an district theuha Civil Defence Mock Drill buatsaih ve turin a chah a ni.
DDMA Aizawl chairman, bawrhsap Er. Lalhriatpuia chuan Civil Defence Mock Drill kalpui dan a report a. DGP Anil Shukla leh member dang atangin an thlirdan ngaihthlak a ni bawk. “Black out” kalpui chu mipuiin an zawm that tawk loh thu leh beisei a phak loh deuh thu sawichhuah a ni.
Aizawl mipuiin ‘black out’ zawm tha tawk loah ngai
